പി.എഫ് പലിശനിരക്ക് കുറച്ച നടപടി പുനഃപരിശോധിക്കണം -കുരുവിള മാത്യൂസ്

കോട്ടയം: എംപ്ലോയീസ് പ്രൊവിഡന്‍റ്​ ഫണ്ട് (ഇ.പി.എഫ്) നിക്ഷേപത്തിനുള്ള പലിശനിരക്ക് കുറച്ച കേന്ദ്രനടപടി പുനഃപരിശോധിക്കണമെന്ന് ആവശ്യപ്പെട്ട് നാഷനലിസ്റ്റ് കേരള കോൺഗ്രസ് സംസ്ഥാന ചെയർമാൻ കുരുവിള മാത്യൂസ് കേന്ദ്ര തൊഴിൽമന്ത്രി ഭൂപേന്ദർ യാദവിന് കത്തയച്ചു. ഈ സാമ്പത്തിക വർഷം 8.1 ശതമാനം പലിശ നൽകിയാൽ മതിയെന്ന് ഇ.പി.എഫ് യേഗത്തിൽ ധാരണയായിരുന്നു. മുൻവർഷം ഇത് 8.5 ശതമാനമായിരുന്നു. രാജ്യത്തെ ആറ് കോടിയിൽപരം ജീവനക്കാർക്ക് ഈ തീരുമാനം ദോഷകരമായി ബാധിക്കുമെന്നും കത്തിൽ ചൂണ്ടിക്കാട്ടി. ദേശീയ പണിമുടക്ക്: ജില്ല പ്രചാരണജാഥ​ ഇന്ന് തുടങ്ങും കോട്ടയം: ഈമാസം 28, 29 തീയതികളിൽ നടക്കുന്ന ദേശീയ പണിമുടക്കിന്‍റെ പ്രചരണാർഥം സംയുക്ത ട്രേഡ് യൂനിയൻ സമിതി ജാഥക്ക്​ ചൊവ്വാഴ്ച തുടക്കമാവും. വൈകീട്ട്​ അഞ്ചിന് വൈക്കത്തുനിന്ന്​ ജാഥ പര്യടനം ആരംഭിക്കും. ജില്ലയിലാകെ പര്യടനം നടത്തുന്ന ജാഥയുടെ ക്യാപ്​റ്റൻ എ.ഐ.ടി.യു.സി സംസ്ഥാന സെക്രട്ടറി അഡ്വ. വി.ബി ബിനുവാണ്. സി.ഐ.ടി.യു സംസ്ഥാന സെക്രട്ടറി കെ.എൻ. ഗോപിനാഥ് ജാഥയുടെ ഉദ്ഘാടനം നിർവഹിക്കും. ഉദ്ഘാടന സമ്മേളനത്തിൽ ഐ.എൻ.ടി.യു.സി ജില്ല പ്രസിഡന്‍റ്​ ഫിലിപ് ജോസഫ് അധ്യക്ഷതവഹിക്കും.