ജോലി കഴിഞ്ഞ് മടങ്ങിയ യുവതിയെ കുത്തിപ്പരിക്കേൽപിച്ചു; യുവാവ് പിടിയിൽ

കളമശ്ശേരി: ജോലി കഴിഞ്ഞ് താമസസ്ഥലത്തേക്ക് മടങ്ങുകയായിരുന്ന യുവതിയെ തടഞ്ഞുനിർത്തി യുവാവ്​ കുത്തിപ്പരിക്കേൽപിച്ചു. ഇടപ്പള്ളി വട്ടേക്കുന്നം തുരങ്കപാതക്ക് സമീപം ഞായറാഴ്ച രാത്രി 8.15 ഓടെയാണ് സംഭവം. പാലക്കാട് കിഴക്കഞ്ചേരി കോലഞ്ചിറ പുത്തനാക്കയം സതീഷ് കുമാറാണ്​ (36) പ്രതി. ഇടപ്പള്ളിയിലെ മാളിൽനിന്ന്​ ജോലി കഴിഞ്ഞ് താമസസ്ഥലത്തേക്ക് മടങ്ങവെ പെരുമ്പാവൂർ സ്വദേശിനിയായ യുവതിയെയാണ്​ തടഞ്ഞുനിർത്തി ആക്രമിച്ചത്. സംഭവം ശ്രദ്ധയിൽപെട്ട നാട്ടുകാർ യുവാവിനെ പിടികൂടി കളമശ്ശേരി പൊലീസിന് കൈമാറുകയായിരുന്നു. കുത്തേറ്റ യുവതിയെ പത്തടിപ്പാലം കിൻഡർ ആശുപത്രിയിൽ പ്രവേശിപ്പിച്ചു.