വാഹനയാത്രികരെ വെട്ടിലാക്കി മേൽപ്പാലത്തിലെ കട്ടിങ്​

കോട്ടയം: നാട്ടകം പാറേച്ചാൽ ബൈപാസ് റോഡ് മേൽപ്പാലത്തിൽ യാത്രികരെ പ്രതിരോധത്തിലാഴ്​ത്തി കട്ടിങ്​. ട്രാവൻകൂർ സിമന്‍റ്​സിന്​ സമീപത്തുനിന്ന്​ മേൽപ്പാലത്തിലേക്ക് പ്രവേശിക്കുന്ന ഭാഗത്താണ് കട്ടിങ്​ രൂപപ്പെട്ടിരിക്കുന്നത്. ഇത് വാഹനയാത്രികരെ ദുരിതത്തിലാക്കുന്നു. ഇരുചക്രവാഹനങ്ങളാണ് കൂടുതലും അപകടത്തിൽപെടുന്നത്. കുമരകം ഭാഗത്തുനിന്ന്​ വരുന്ന വാഹനങ്ങൾ​ പാലം ഇറങ്ങിവരുമ്പോൾ അപകടത്തിൽപ്പെടുന്ന അവസ്ഥയാണ്​. വാഹനയാത്രികർ അടുത്തെത്തുമ്പോഴാണ് കട്ടിങ്​ കാണാൻ സാധിക്കുന്നത്. വാഹനങ്ങൾക്ക് കേടുപാടുകളും സംഭവിക്കുന്നു. നാട്ടകം സിമന്‍റ്​ കവലയിൽനിന്ന്​ ട്രാഫിക് ബ്ലോക്കിൽ അകപ്പെടാതെ ഇല്ലിക്കൽ ഭാഗത്തേക്ക്​ എത്താൻ സാധിക്കുന്നതിനാൽ നിരവധിപേർ ഈ റോഡിനെ ആശ്രയിക്കുന്നുണ്ട്​. എം.സി റോഡിലേക്കുള്ള എളുപ്പവഴിയായും ബൈപാസ് റോഡാണ് ഉപയോഗിക്കുന്നത്. ഇടക്കാലത്ത് കട്ടിങ്ങിലെ ചെറിയൊരു ഭാഗം കോൺക്രീറ്റ് ചെയ്‌തെങ്കിലും ഇത്​ പഴയ അവസ്ഥയിലായി. കൂടാതെ പാലത്തിൽ വലിയ വിടവും രൂപപ്പെട്ടിട്ടുണ്ട്​. പ്രധാനമായും രാത്രിയിൽ ഇതുവഴി സഞ്ചരിക്കുന്നവരാണ്​ അപകടത്തിൽപ്പെടുന്നത്. പാലത്തിലെ വിടവ്​ നികത്തി യാത്ര സുഗമമാക്കണമെന്ന​ ആവശ്യം ശക്തമാകുകയാണ്​.