പോത്തുകളുമായി വന്ന വാഹനം അപകടത്തിൽപെട്ടു

പാലാ: പോത്തുകളെ കയറ്റിവന്ന മിനിലോറിയുടെ പ്ലാറ്റ്‌ഫോം ഇളകിത്തെറിച്ചു. പ്ലാറ്റ്‌ഫോമിനൊപ്പം റോഡിലും സമീപ പുരയിടത്തിലും തെറിച്ചുവീണ്‌ പരിക്കുപറ്റിയ പോത്തുകളെ കശാപ്പുകാർ കടത്തിക്കൊണ്ടുപോയി. വെള്ളിയാഴ്ച വൈകീട്ട്‌ ഏഴരയോടെ പാലാ-തൊടുപുഴ റോഡിൽ പിഴക്‌ ജങ്‌ഷനിലാണ്‌ സംഭവം. റോഡരികിൽ നിർത്തിയിട്ട ഓട്ടോറിക്ഷക്കും പ്ലാറ്റ്‌ഫോം തെറിച്ചുവീണ്‌ തകരാർ സംഭവിച്ചു. പോത്ത് ഉൾപ്പെടെ പ്ലാറ്റ്ഫോം റോഡിൽ വീണിട്ടും 200 മീറ്ററോളം മുന്നോട്ടുപോയാണ് ഡ്രൈവർ വാഹനം നിർത്തിയത്. മാനത്തൂരിലെ സ്വകാര്യ ഫാമിൽനിന്ന്‌ വാങ്ങിയ നാല്‌ പോത്തിനെ കയറ്റി പാലായിലെ കശാപ്പുകേന്ദ്രത്തിലേക്ക്‌ പോവുകയായിരുന്നു ലോറി. സംഭവം ഉണ്ടായ ഉടൻ പാലായിൽനിന്ന്‌ എത്തിയ വാഹനത്തിലാണ്‌ റോഡിൽ വീണ്‌ ഗുരുതര പരിക്കേറ്റ്‌ അവശതയിലായ പോത്തുകളെ കശാപ്പിന്​ കയറ്റി പോയത്‌. രാമപുരം പൊലീസ് സ്ഥലത്തെത്തി വാഹനം കസ്റ്റഡിയിലെടുത്തു.