ഡിജിറ്റല്‍ റീസര്‍വേ: ജനപ്രതിനിധികൾ പിന്തുണ നൽകണം -മന്ത്രി എം.വി. ഗോവിന്ദൻ

കോട്ടയം: ഭൂരേഖ ഡിജിറ്റൽ രൂപത്തിലാക്കുന്നതിന് റവന്യൂ സർവേ വകുപ്പ് നടപ്പാക്കുന്ന ഡിജിറ്റല്‍ റീസർവേ വിജയകരമായി പൂർത്തിയാക്കുന്നതിന് ജില്ലയിലെ മുഴുവൻ ജനപ്രതിനിധികളും പിന്തുണ നൽകണമെന്ന് മന്ത്രി എം.വി. ഗോവിന്ദന്‍. സർവേ സംബന്ധിച്ച് ജനപ്രതിനിധികൾക്കായി ഓൺലൈൻ മുഖേന സംഘടിപ്പിച്ച ബോധവത്​കരണ ശിൽപശാല ഉദ്ഘാടനം ചെയ്യുകയായിരുന്നു അദ്ദേഹം. ഡിജിറ്റല്‍ സർവേ പൂര്‍ത്തിയാകുന്നതോടെ ഭൂമിയുമായി ബന്ധപ്പെട്ട് നിലനില്‍ക്കുന്ന പ്രശ്നങ്ങള്‍ക്കും പരാതികൾക്കും പരിഹാരമാകുമെന്ന് അദ്ദേഹം പറഞ്ഞു. ജനകീയപിന്തുണ ശക്തിപ്പെടുത്തുന്നതിനും പ്രവര്‍ത്തനങ്ങള്‍ സുഗമമാക്കുന്നതിനും ജില്ലതലം മുതല്‍ പ്രാദേശിക തലംവരെ ജനകീയ കമ്മിറ്റികള്‍ക്ക് രൂപം നല്‍കും. ജനങ്ങള്‍ക്ക് ബോധവത്​കരണം നല്‍കി പൂര്‍ണ ജനപങ്കാളിത്തത്തോടെയാണ് ഡിജിറ്റല്‍ സര്‍വേ ആരംഭിക്കുകയെന്നും മന്ത്രി പറഞ്ഞു. ലാൻഡ് റവന്യൂ കമീഷണർ കെ. ബിജു, കലക്ടര്‍ ഡോ. പി.കെ. ജയശ്രീ, സര്‍വേ ആന്‍ഡ് ലാന്‍ഡ് റെക്കോഡ്​സ് ഡയറക്ടര്‍ സാംബശിവ റാവു എന്നിവർ സംസാരിച്ചു. ആദ്യഘട്ടത്തില്‍ വൈക്കം, കല്ലറ, വെള്ളൂര്‍, ഉദയനാപുരം, നടുവില, കുലശേഖരമംഗലം, വെച്ചൂര്‍, തലയാഴം, ചെമ്പ് എന്നീ വില്ലേജുകളാണ് ഉള്‍പ്പെടുത്തിയിട്ടുള്ളത്. നടുവിലേ വില്ലേജിൽ സർവേ നടപടികള്‍ പുരോഗമിച്ചുകൊണ്ടിരിക്കുകയാണ്. ഇതില്‍ ആദ്യപടിയായി ഡ്രോണ്‍ അധിഷ്ഠിത സർവേയാണ് ആരംഭിച്ചിട്ടുള്ളത്.