റിറ്റി കുതിരക്ക് കുറിച്ചി വിടചൊല്ലി: സംസ്കരിക്കാൻ സ്ഥലം വിട്ടുനൽകി പ്രമീള

ചങ്ങനാശ്ശേരി: കുറിച്ചി പഞ്ചായത്ത് നാലാംവാർഡ് മന്ദിരം കവല എണ്ണക്കാച്ചിറയിൽ തുണ്ടിപ്പറമ്പിൽ ബിജു കുമാറിന്‍റെ റിറ്റി എന്ന കുതിര മരണപ്പെട്ടു. അഞ്ചുവർഷം മുമ്പ് ഓച്ചിറയിൽനിന്ന് വാങ്ങിയതാണ്. ഒമ്പത്​ വയസ്സ് പ്രായമുള്ള പെൺകുതിര ആയിരുന്നു റിറ്റി. കുടൽ സംബന്ധമായ അസുഖത്തെ തുടർന്നാണ് മരണപ്പെട്ടത്. ആശുപത്രിയിൽ എത്തിച്ച് രണ്ടുതവണ ട്രിപ്പും രണ്ടുതവണ ഇൻജക്​ഷനും നൽകിയെങ്കിലും കുതിരയെ രക്ഷിക്കാനായില്ല. രണ്ട്​ സെന്‍റ്​ മാത്രം ഭൂമിയുള്ള ബിജുവിന് റിറ്റിയെ അടക്കാൻ മാർഗമുണ്ടായിരുന്നില്ല. അന്വേഷണങ്ങൾക്ക് ഒടുവിൽ കുറിച്ചി പഞ്ചായത്ത് മെംബർ ബി.ആർ. മഞ്ജീഷിന്‍റെ ശ്രമഫലമായി ഇത്തിത്താനത്ത് പ്രസന്ന സദനത്തിൽ പ്രമീളയുടെ പുരയിടത്തിൽ കുതിരയെ മറവ് ചെയ്യാൻ സൗകര്യം ലഭിച്ചു. കോട്ടയത്തുനിന്ന് വണ്ടിയിൽ എത്തിച്ച് കുതിരയെ മറവ് ചെയ്തു.