കൃഷിചെയ്ത പച്ചക്കറികൾ സ്കൂളിന്​​ നൽകി മാതൃകയായി വിദ്യാർഥികൾ

വൈക്കം: വീട്ടുമുറ്റത്തും മട്ടുപ്പാവിലും കൃഷിചെയ്ത പച്ചക്കറികൾ സ്കൂൾ ഉച്ചഭക്ഷണ പരിപാടിക്ക് നൽകി മാതൃകയായി​ വൈക്കം പള്ളിപ്രത്തുശ്ശേരി സെന്‍റ്​ ലൂയീസ് യു.പി സ്കൂൾ വിദ്യാർഥികളായ ശിഖ സുധീറും നിഖ സുധീറും. ആറാം ക്ലാസിലും നഴ്സറിയിലും പഠിക്കുന്ന കുട്ടികൾ കൃഷികാര്യങ്ങളിൽ ഏറെ താൽപര്യം പ്രകടിപ്പിക്കുന്നുണ്ട്​. ഈ താൽപര്യം മനസ്സിലാക്കിയ സ്കൂൾ അധികൃതരും രക്ഷിതാക്കളും മികച്ച പ്രോത്സാഹനമാണ്​ ഇവർക്ക്​ നൽകിയത്. കോവിഡ് മൂലം സ്കൂൾ അടച്ചിട്ടകാലത്ത് കൃഷിപ്പണിക്ക്​ ശിഖയും നിഖയും സമയം മാറ്റിവെച്ചു. ചീര, തക്കാളി, പച്ചമുളക്, വെണ്ട എന്നിവയാണ് പ്രധാനമായും കൃഷി ചെയ്തത്. വീട്ടുമുറ്റവും വീടി‍ൻെറ ടെറസുമാണ് കൃഷിയിടങ്ങൾ. ശിഖയുടെയും നിഖയുടെയും മാതാപിതാക്കളായ സുധീറും രാജിയും സ്കൂളിലെ പി.ടി.എ എക്സിക്യൂട്ടിവ് അംഗങ്ങളാണ്​. സ്കൂൾ ഹെഡ്മാസ്റ്റർ ബൈജുമോൻ ജോസഫ്, അധ്യാപികമാരായ സ്റ്റെല്ല ജോസഫ്, സിസ്റ്റർ സ്മിത പൗലോസ്, സിസ്റ്റർ റിറ്റി പോൾ, റെജി ജോസഫ്, കെ.ജെ. ജിൻസി എന്നിവർ വീട്ടിലെത്തി പച്ചക്കറികൾ ഏറ്റുവാങ്ങി. പടം: കുട്ടികൾ കൃഷിചെയ്ത പച്ചക്കറികൾ സ്കൂൾ ഹെഡ്മാസ്റ്റർ ബൈജുമോൻ ജോസഫിന്‍റെ നേതൃത്വത്തിൽ സ്വീകരിക്കാൻ എത്തിയപ്പോൾ