കാട്ടുതീ; ഏക്കർ കണക്കിന്​ ഭൂമി കത്തിനശിച്ചു

മുട്ടം (ഇടുക്കി): കൊല്ലംകുന്ന്, അറയാനി ഭാഗങ്ങളിൽ വൻ കാട്ടുതീ. ബുധനാഴ്ച പടർന്ന തീ വ്യാഴാഴ്ചയും പൂർണമായി അണക്കാനായിട്ടില്ല. അഗ്​നിരക്ഷാസേന സ്ഥലത്ത് എത്തിയിട്ടുണ്ട്. ആൾതാമസമില്ലാത്ത മേഖലയായ കൊല്ലംകുന്ന് മലയിൽ പടർന്നുപിടിച്ച തീ പിന്നീട്​ ജനവാസമേഖലയായ പി.സി.ടി കോളനി, പച്ചിലാംകുന്ന് ഭാഗങ്ങളിലേക്ക്​ എത്തി. ഏക്കർ കണക്കിന് ഭൂമിയാണ് ഇവിടെ കത്തിനശിച്ചത്. തീ വീടുകൾക്ക് സമീപം എത്തിയതോടെ ജനം പരിഭ്രാന്തരായി. 80ലേറെ വീടുകളുള്ള പി.സി.ടി കോളനിയിൽ തീ എത്തിയതോടെയാണ് ജനങ്ങൾ അഗ്​നിരക്ഷാസേനയെ അറിയിച്ചത്. ഏക്കറുകണക്കിന് സ്ഥലത്ത് പരന്നുകിടക്കുന്ന പാറക്കൂട്ടങ്ങളിലെ പുൽമേടും മരങ്ങളുമാണ് കത്തി നശിച്ചത്. തീപിടിച്ച് വൻ മരങ്ങൾ ഉൾപ്പെടെ പാറക്ക് മുകളിൽനിന്ന്​ ഊർന്നുവീണു. ഫയർഫോഴ്‌സിന്റെ വാഹനം എത്താത്ത പ്രദേശങ്ങളിൽ തീപടരുന്നത് രക്ഷാ പ്രവർത്തനം വൈകാൻ കാരണമാകും. അഗ്​നിരക്ഷാസേനയും നാട്ടുകാരും രാത്രി വൈകിയും തീയണക്കാനുള്ള ശ്രമത്തിലാണ്. TDG100 Fire 1 കൊല്ലംകുന്ന്, അറയാനി ഭാഗങ്ങളിൽ പടർന്നുപിടിച്ച കാട്ടുതീ