ചങ്ങനാശ്ശേരി ഗവ. മോഡല്‍ ഹൈസ്‌കൂളിൽ പഠന ഗവേഷണ പദ്ധതി

ചങ്ങനാശ്ശേരി: വിക്രം സാരാഭായി സ്​പേസ് സെന്‍ററുമായി ചേര്‍ന്ന്​ ചങ്ങനാശ്ശേരി ഗവ. മോഡല്‍ ഹൈസ്‌കൂള്‍ വിദ്യാർഥികള്‍ക്കായി ഒരുവര്‍ഷം നീളുന്ന പഠനഗവേഷണം ഒരുക്കുന്നു. കേരളത്തില്‍ ആദ്യമായാണ്​ പഠനഗവേഷണ പദ്ധതി സ്‌കൂളില്‍ നടത്തപ്പെടുന്നതെന്ന് സ്‌കൂള്‍ പ്രധാന അധ്യാപകന്‍ എന്‍. രഘു അറിയിച്ചു. വെള്ളിയാഴ്ച രാവിലെ 11ന് അഡ്വ. ജോബ് മൈക്കിള്‍ എം.എല്‍.എ ഉദ്ഘാടനം ചെയ്യും. ചങ്ങനാശ്ശേരി നഗരസഭ അധ്യക്ഷ സന്ധ്യ മനോജ് അധ്യക്ഷതവഹിക്കും. തുടര്‍ന്ന് വി.എസ്.എസ്.സിയുമായി ചേര്‍ന്ന്​ ഉച്ചക്ക്​ രണ്ട് മുതല്‍ രാത്രി എട്ടുവരെയും അഞ്ചിന് രാവിലെ 10 മുതല്‍ വൈകീട്ട് എട്ട് വരെയും സ്‌പേസ്​ ഓണ്‍ വീല്‍സ് സൗജന്യ ശാസ്ത്രപ്രദര്‍ശനം നടത്തും. വി.എസ്.എസ്.എസി അസോ. ഡയറക്ടര്‍ എം. നാരായണന്‍ നമ്പൂതിരിപ്പാട് മുഖ്യപ്രഭാഷണം നടത്തും. ആഴ്ചയിലൊന്ന്​ വീതമുള്ള 10 മൊഡ്യൂളുകളായാണ് വെബിനാര്‍ സംഘടിപ്പിക്കുന്നത്. എട്ടുമുതല്‍ 12വരെ ക്ലാസുകളിലെ തെരഞ്ഞെടുക്കപ്പെടുന്ന വിദ്യാർഥികള്‍ക്കാണ് പ്രവേശനം. പ്രവേശനം സൗജന്യമാണ്. മറ്റ് സ്‌കൂളിലെ വിദ്യാർഥികള്‍ക്കും അവസരമുണ്ട്. ജില്ലയിലെ 56 സ്‌കൂളുകളിലെ കുട്ടികള്‍ പഠനത്തിന്‍റെ ഭാഗമാകും. ഒരു സ്‌കൂളില്‍നിന്ന്​ 10 കുട്ടികളെയാണ് തെരഞ്ഞെടുക്കുന്നത്. ഐസര്‍, കൂടംകുളം ആണവനിലയം, എന്നിവിടങ്ങളിലേക്കുള്ള പഠനയാത്രയും ശാസ്ത്രജ്ഞരുമായി സംവദിക്കാനുള്ള അവസരവും ഉണ്ടായിരിക്കും. ഇലക്ട്രിക്, ഇലക്ട്രോണിക്‌സ്- രാസപരീക്ഷണങ്ങള്‍, യു.പി വിഭാഗം കുട്ടികള്‍ക്കായി നടത്തും. യങ് സയന്‍റിസ്റ്റ് പ്രോഗ്രാം കോഓഡിനേറ്റര്‍ ടി.എ മാര്‍ട്ടിന്‍, അധ്യാപകന്‍ എ.കെ ഷാജി, പി.ടി.എ പ്രസിഡന്‍റ്​ ആര്‍. ശെല്‍വകുമാര്‍ എന്നിവരും വാര്‍ത്തസമ്മേളനത്തില്‍ പങ്കെടുത്തു.