ചെറുവള്ളി പള്ളിപ്പടി പാലം ഈവർഷം പൂർത്തീകരിക്കും -ഡോ. എൻ. ജയരാജ്

പൊൻകുന്നം: കഴിഞ്ഞ പ്രളയകാലത്ത്​ പൂർണമായി ഒലിച്ചുപോയ ചെറുവള്ളി പള്ളിപടിക്കൽ പാലം 2022ൽ പണി പൂർത്തീകരിക്കുമെന്ന് ഗവ. ചീഫ്. വിപ്പ് ഡോ. എൻ. ജയരാജ്‌. കേരള കോൺഗ്രസ്‌ എം ചിറക്കടവ് മണ്ഡലം പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കാഞ്ഞിരപ്പള്ളി-മണ്ണനാനി റോഡ് കിഫ്‌ബിയിൽ ഉൾപ്പെടുത്തി 95 കോടിക്കുള്ള ഭരണാനുമതിയായിട്ടുണ്ട്. 50 വർഷം പൂർത്തിയാകുന്ന പൊൻകുന്നം കെ.എസ്‌.ആർ.ടി.സി ഡിപ്പോയുടെ നവീകരണവുമായി ബന്ധപ്പെട്ട് മന്ത്രിതല ചർച്ച നടക്കുകയാണ്. പുതിയ ഗ്രാമീണ സർവികൾ തുടങ്ങുമെന്നും അദ്ദേഹം പറഞ്ഞു. മണ്ഡലം പ്രസിഡന്‍റ്​ ഷാജി നല്ലേപറമ്പിലിന്‍റെ അധ്യക്ഷതയിൽ കൂടിയ യോഗത്തിൽ ഷാജി പാമ്പൂരി, സണ്ണി ഞള്ളിയിൽ, മാത്തുകുട്ടി മണ്ണൂർ, തോമസ് പാട്ടത്തിൽ, ഷൈല ജോൺ, അബ്‌ദുൽ റഹ്മാൻ, സുമേഷ് ആൻഡ്രൂസ്, ആന്‍റണി മാർട്ടിൻ, എബ്രഹാം, രാഹുൽ ബി.പിള്ള, ഫിനോ പുതുപ്പറമ്പിൽ എന്നിവർ സംസാരിച്ചു.