കാമുകനൊപ്പം ജീവിക്കാൻ ഭർത്താവിനെ മയക്കുമരുന്ന് കേസിൽ കുടുക്കിയ പഞ്ചായത്തംഗവും സഹായികളും അറസ്റ്റിൽ

എൽ.ഡി.എഫ്​ സ്വതന്ത്രയാണ്​ പഞ്ചായത്ത്​അംഗം കട്ടപ്പന: കാമുകനൊപ്പം ജീവിക്കാൻ ഭർത്താവിനെ മയക്കുമരുന്ന്​ കേസിൽ കുടുക്കിയ പഞ്ചായത്ത്​അംഗവും രണ്ട്​ സഹായികളും അറസ്റ്റിൽ. ഇടുക്കി വണ്ടന്മേട് പുറ്റടി അമ്പലമേട്​ തൊട്ടാപുരക്കൽ സുനിലിന്‍റെ ഭാര്യയും വണ്ടന്മേട് ഗ്രാമ പഞ്ചായത്തിലെ എൽ.ഡി.എഫ്​ സ്വതന്ത്ര അംഗവുമായ സൗമ്യ സുനിൽ (33), സുനിലിന്‍റെ ബൈക്കിൽ ഒളിപ്പിക്കാൻ മയക്കുമരുന്നായ എം.ഡി.എം.എ കൊണ്ടുവന്ന കൊല്ലം വേങ്ങക്കര റഹിയമൻസിലിൽ എസ്​. ഷാനവാസ് (39), കൊല്ലം മുണ്ടക്കൽ അനിമോൻ മൻസിലിൽ എസ്​. ഷെഫിൻഷാ(24) എന്നിവരാണ് അറസ്റ്റിലായത്. ഗൾഫിലേക്ക് കടന്ന കാമുകൻ വിനോദിനെ (43) നാട്ടിലെത്തിച്ച്​ അറസ്റ്റ് ചെയ്യാൻ പൊലീസ് നടപടി തുടങ്ങി. ഭർത്താവിനെ ഇല്ലാതാക്കാൻ ഭാര്യയും കാമുകനും ചേർന്ന് കൂടത്തായി മോഡൽ ഗൂഢാലോചന നടത്തിയതായും പൊലീസ്​ പറയുന്നു. കഴിഞ്ഞ 22ന്​ രാവിലെയാണ്​ സൗമ്യയുടെ ഭർത്താവ് സുനിലിന്‍റെ ബൈക്കിൽനിന്ന്​ മാരക മയക്കുമരുന്നായ എം.ഡി.എം.എ പിടികൂടിയത്. ഇടുക്കി പൊലീസിന് ലഭിച്ച രഹസ്യ വിവരത്തെ തുടർന്ന്​ വഴിയരികിൽ പാർക്ക്‌ ചെയ്ത ബൈക്കിൽനിന്ന് അഞ്ചു ഗ്രാം എം.ഡി.എം.എ പിടിച്ചെടുക്കുകയായിരുന്നു.​ സുനിലിനെ കസ്റ്റഡിയിലെടുത്ത്​ ചോദ്യം ചെയ്തപ്പോൾ മയക്കുമരുന്ന് ഉപയോഗിക്കുകയോ വിൽക്കുകയോ ചെയ്യുന്ന ആളല്ലെന്ന് വ്യക്തമായി. തന്നെ ആരോ കെണിയിൽ പെടുത്തിയതാകാമെന്ന സുനിലിന്‍റെ മൊഴിയാണ് പഞ്ചായത്ത്‌ അംഗമായ ഭാര്യയുടെയും സഹായികളുടെയും അറസ്റ്റിലേക്ക് നയിച്ചത്. ഭർത്താവിനെ ജയിലിലാക്കി കാമുകനൊപ്പം ജീവിക്കാനുള്ള സൗമ്യയുടെ ഗൂഢ പദ്ധതിയുടെ ഭാഗമായാണ്​ മയക്കുമരുന്ന്​ കേസിൽപ്പെടുത്താൻ ശ്രമിച്ചത്​. കഴിഞ്ഞ 18ന് സുഹൃത്തുക്കളായ ഷാനവാസും ഷെഫിനും ചേർന്ന് വണ്ടൻമേട് ആമയാറ്റിൽ ​വെച്ച്​ മയക്കുമരുന്ന്​ സൗമ്യയുടെ കാമുകനായ വിനോദിന്​ കൈമാറി. ഇത് സൗമ്യയെ ഏൽപ്പിച്ചശേഷം വി​നോദ്​ ഗൾഫിലേക്ക് കടന്നു. 22ന് സൗമ്യ മയക്കുമരുന്ന്​ സുനിലിന്റെ ബൈക്കിൽവെച്ചശേഷം ഫോട്ടോ എടുത്ത്​ വിനോദിന്​ അയച്ച് കൊടുത്തു. സുനിലിന്‍റെ ബൈക്കിൽ മയക്കുമരുന്ന്​ ഉള്ള വിവരം വിനോദ്​ പൊലീസിനെയും മറ്റിതര ഏജൻസികളെയും അറിയിച്ചു. തുടർന്നാണ്​ പൊലീസ്​ പരിശോധന നടത്തിയത്​. ഒരു വർഷമായി സൗമ്യയും വിനോദും അടുപ്പത്തിലായിരുന്നു. സുനിലിനെ ആദ്യം വാഹനം ഇടുപ്പിച്ചോ സയനൈഡ് പോലുള്ള മാരകവിഷം നൽകിയോ കൊലപ്പെടുത്താൻ ഇരുവരും ചേർന്ന് പദ്ധതി ഇട്ടെങ്കിലും പിന്നീട്​ ഭയം കാരണം സൗമ്യ ഇതിൽനിന്ന്​ പിൻമാറി. എന്നാൽ, സൗമ്യയും വിനോദും രഹസ്യ ബന്ധം തുടർന്നു. ഒരു മാസം മുമ്പ്​ എറണാകുളത്ത് ആഡംബര ഹോട്ടലിൽ മുറിയെടുത്ത്​ താമസിച്ചാണ്​ മയക്കുമരുന്ന്​ കെണി ആസൂത്രണം ചെയ്​തത്​. സംഭവത്തിൽ കൂടുതൽ പേർ ഉൾപ്പെട്ടിട്ടുണ്ടോ എന്നും പൊലീസ് അന്വേഷിക്കുന്നുണ്ട്. ഷാനവാസും ഷെഫിൻഷായും ചേർന്ന് എറണാകുളത്ത്​ നിന്ന് 45000 രൂപക്കാണ് വിനോദിന് മയക്കുമരുന്ന് എത്തിച്ച്​ കൊടുത്തതെന്നും പൊലീസ് കണ്ടെത്തി. പ്രതികളെ ശനിയാഴ്ച കോടതിയിൽ ഹാജരാക്കും. ജില്ല പൊലീസ് മേധാവി ആർ. കറുപ്പസ്വാമിയുടെ പ്രത്യേക നിർദേശപ്രകാരം കട്ടപ്പന ഡിവൈ.എസ്​.പി വി.എ. നിഷാദ് മോന്റെ നേതൃത്വത്തിലാണ് പ്രതികളെ അറസ്റ്റ് ചെയ്തത്. ഫോട്ടോ. സൗമ്യ. അറസ്റ്റിലായ ഷാനവാസും ഷെഫിൻഷായും