ദിവാൻകവലയിലെ ഇന്ദിരഗാന്ധി സ്മൃതിമണ്ഡപം പൊലീസ്​ പൊളിച്ചുനീക്കി

കോട്ടയം: നാട്ടകം മൂലവട്ടം ദിവാൻകവലയിലെ വിവാദമായ ഇന്ദിരഗാന്ധി സ്മൃതി മണ്ഡപം പൊലീസ്​ പൊളിച്ചുനീക്കി. തിങ്കളാഴ്ച വൈകീട്ട് നാലുമണിയോടെ വൻ പൊലീസ് സാന്നിധ്യത്തിൽ ജെ.സി.ബി ഉപയോഗിച്ചാണ്​ സ്തൂപം പൊളിച്ചുനീക്കിയത്​. കലക്ടറുടെ നിർദേശത്തെ തുടർന്നായിരുന്നു നടപടി. വർഷങ്ങളായി ദിവാൻകവലയിൽ നിൽക്കുന്ന ഇന്ദിരഗാന്ധി സ്മൃതി മണ്ഡപത്തിനുചുറ്റും സി.പി.എം ജില്ല സമ്മേളനത്തോട്​ അനുബന്ധിച്ച്​ ചുവപ്പ്​ തോരണങ്ങളും കൊടികളും സ്ഥാപിച്ചതിനെ തുടർന്നാണ്​ ഇരുവിഭാഗങ്ങൾ തമ്മിൽ സംഘർഷം തുടങ്ങിയത്​. സ്തൂപത്തിനരികിൽ സി.പി.എം സ്ഥാപിച്ച അലങ്കാരപ്പണികളും കൊടികളും കോൺഗ്രസുകാർ പൊളിച്ചുനീക്കി. ഇതുസംബന്ധിച്ച്​ സി.പി.എം നൽകിയ കേസിൽ ജില്ല കോൺഗ്രസ് കമ്മിറ്റി പ്രസിഡന്‍റ്​ നാട്ടകം സുരേഷ്, യൂത്ത് കോൺഗ്രസ് മണ്ഡലം സെക്രട്ടറി രാഹുൽ മറിയപ്പള്ളി എന്നിവർക്കെതിരെ ചിങ്ങവനം പൊലീസ് കേസെടുത്തിരുന്നു. രാഹുൽ മറിയപ്പള്ളിയെ അറസ്റ്റ്​ ചെയ്ത്​ വിട്ടയക്കുകയും ചെയ്തു. ഇതിനു പിന്നാലെയാണ് ഇപ്പോൾ സ്​തൂപം പൊളിച്ചുനീക്കിയത്. സ്തൂപത്തെച്ചൊല്ലി സംഘർഷമുണ്ടാവുമെന്ന വിവരത്തെത്തുടർന്ന്​ രണ്ടാഴ്ചയായി പരിസരത്ത്​ പൊലീസ്​ ക്യാമ്പ്​ ചെയ്യുന്നുണ്ടായിരുന്നു. സി.പി.എം പ്രവർത്തകർ സ്തൂപം തകർക്കുമെന്ന രഹസ്യാന്വേഷണ റിപ്പോർട്ടുകളുമുണ്ടായിരുന്നു. ഇതേത്തുടർന്നു ചിങ്ങവനം പൊലീസി‍ൻെറ റിപ്പോർട്ടി‍ൻെറ അടിസ്ഥാനത്തിലാണ് കലക്ടർ പൊളിക്കാൻ നിർദേശം നൽകിയത്.