കുമരകം പക്ഷിസങ്കേതത്തിൽ പ്രവേശനഫീസ് കുത്തനെ കൂട്ടി

കോട്ടയം: . 50 രൂപയായിരുന്ന പ്രവേശന ഫീസാണ് ഒറ്റയടിക്ക് 100 രൂപയാക്കിയത്​. ഇതോടെ പക്ഷിസങ്കേതം സന്ദർശിക്കാനെത്തുന്ന സഞ്ചാരികൾ പലരും നിരാശരായി മടങ്ങുകയാണ്​. അടിസ്ഥാന സൗകര്യങ്ങളൊന്നുമില്ലാത്ത പക്ഷിസങ്കേതത്തിൽ പ്രവേശന ഫീസ് വർധിപ്പിച്ചത് അന്യായമാണെന്ന്​ ആക്ഷേപമുണ്ട്​. കോവിഡിനെ തുടർന്ന് വിദേശ വിനോദസഞ്ചാരികളും ഉത്തരേന്ത്യൻ സഞ്ചാരികളും കുമരകത്തേക്ക് എത്തുന്നില്ല. കേരളത്തിലെ സഞ്ചാരികൾ മാത്രമാണ് കുമരകം പക്ഷിസങ്കേതം സന്ദർശിക്കാനെത്തുന്നത്. അഞ്ചുപേരടങ്ങുന്ന കുടുംബത്തിന് പക്ഷിസങ്കേതം സന്ദർശിക്കാൻ വൻതുക ചെലവഴിക്കേണ്ടിവരും. ഇതിനെതിരെ പ്രതിഷേധം വ്യാപകമാണ്​. കുമരകം സന്ദർശിക്കാനെത്തുന്ന സഞ്ചാരികൾ പക്ഷിസങ്കേതം കാണാതെ മടങ്ങാറില്ല. വിവിധതരം പക്ഷികളെയും ജൈവവൈവിധ്യങ്ങളെയും കാണാനുള്ള അവസരംകൂടിയാണിത്​. പ്രവേശനഫീസ് കുത്തനെ ഉയർത്തിയത് വിനോദസഞ്ചാരികളുടെ വരവിനെ ബാധിക്കുമെന്ന് ആശങ്കയുണ്ട്​. പക്ഷിനിരീക്ഷണത്തിൽ താൽപര്യമുള്ള വിദ്യാർഥികളടക്കം നിരവധിപേരും ഇവിടെയെത്തുന്നുണ്ട്​. ഫീസ്​ കൂട്ടിയത്​ ഇവരെയും ബുദ്ധിമുട്ടിലാക്കും. ടിക്കറ്റ് നിരക്ക് കുറക്കണമെന്ന് ആവശ്യപ്പെട്ട്​ കെ.ടി.ഡി.സി ചെയർമാന് കത്തു നൽകുമെന്ന്​ പഞ്ചായത്ത് പ്രസിഡന്‍റ്​ ധന്യ സാബു പറഞ്ഞു.