പുരസ്​കാരത്തിളക്കത്തിൽ ഉള്ളനാട് സാമൂഹികാരോഗ്യ കേന്ദ്രം

പാലാ: ഉള്ളനാട് സാമൂഹികാരോഗ്യകേന്ദ്രത്തിന് സംസ്ഥാന സര്‍ക്കാറിന്‍റെ കായകല്‍പം കമാന്‍ഡേഷന്‍ അവാര്‍ഡ്. ശുചിത്വപരിപാലനം, അണുബാധ നിയന്ത്രണം, പൊതുജനാരോഗ്യ പ്രവര്‍ത്തനങ്ങള്‍ എന്നിവ വിലയിരുത്തിയാണ്​ അംഗീകാരം. ജില്ലയിൽ ഇത്തവണ കമാന്‍ഡേഷന്‍ അവാര്‍ഡ് ലഭിച്ച ഏക കമ്മ്യൂണിറ്റി ഹെല്‍ത്ത് സെന്‍ററാണ് ഉള്ളനാട്. ഒരുലക്ഷം രൂപയാണ് അവാർഡ് തുക. ളാലം ബ്ലോക്ക് പഞ്ചായത്തിന്‍റെ കീഴില്‍ പ്രവര്‍ത്തിക്കുന്ന ഈ ആതുരാലയത്തിന്​ ഭരണങ്ങാനം ഗ്രാമപഞ്ചായത്തിന്‍റെ പിന്തുണയുമുണ്ട്​. ആതുരസേവനത്തിനൊപ്പം കൃഷിവകുപ്പുമായി സഹകരിച്ചുകൊണ്ട്​ ആശുപത്രി ജീവനക്കാർ പച്ചക്കറി കൃഷി നടത്തുന്നുവെന്നതും ശ്രദ്ധേയമാണ്​. മഴവെള്ള സംഭരണത്തിനായി 20,000 ലിറ്റര്‍ മഴവെള്ള സംഭരണി, പടുതാക്കുളം എന്നിവയും ഇവിടെയുണ്ട്​. രോഗകള്‍ക്കും കൂട്ടിരിപ്പുകാര്‍ക്കുമുള്ള 'വായനമൂല' യും ഇവിടുത്തെ മറ്റൊരു പ്രത്യേകതയാണ്. ശാസ്ത്രീയമായ രീതിയിലുള്ള മാലിന്യസംസ്‌കരണവും ഇവിടെ നടത്തുന്നു. ജീവനക്കാരുടെ അര്‍പ്പണ മനോഭാവത്തിന്‍റെയും കഠിനപ്രയത്‌നത്തിന്‍റെയും ഫലമാണ് ഈ അവാര്‍ഡ് എന്ന് മെഡിക്കല്‍ ഓഫിസര്‍ ഡോ. ജെയ്‌സി എം.കട്ടപ്പുറം പറയുന്നു.