സംഗീതവും സിനിമയും കുട്ടിക്കളിയല്ല, ഈ കുട്ടിക്കൂട്ടത്തിന്​

-സംഗീതപ്രേമികൾക്കിടയിൽ ചർച്ചയാവുകയാണ്​ 'ഈശോയെ' എന്നുതുടങ്ങുന്ന ഗാനം കോട്ടയം: ഈ ആൽബത്തിനുപിന്നിൽ കുട്ടികളാണെങ്കിലും കുട്ടിപ്പാട്ടല്ല ഇത്​, കുട്ടിക്കളിയുമല്ല. കഴിഞ്ഞയാഴ്ച യൂട്യൂബിൽ റിലീസ്​ ചെയ്ത ക്രിസ്തീയ ഭക്തിഗാനത്തെക്കുറിച്ചാണ്​ പറയുന്നത്​. പാടിയത്​ നാലര വയസ്സുകാരി ഇസബെൽ. സംഗീതം 13കാരൻ ഗിച്ചിനും മിക്സിങ് മാസ്റ്ററിങ് 15കാരൻ റിച്ചിനും. ഇരുവരും സഹോദരങ്ങളുമാണ്​. പിന്നണിയിലെ ഈ കുട്ടിക്കൂട്ടങ്ങളുടെ പേരിൽ സംഗീതപ്രേമികൾക്കിടയിൽ ചർച്ചയാവുകയാണ്​ 'ഈശോയെ' എന്നുതുടങ്ങുന്ന ഗാനം.​ ഇസബെൽ സേറ അനീഷാണ്​ കൂട്ടത്തിലെ കുരുന്ന്​. നാലര വയസ്സിലാണ്​ പാട്ടു പാടിയതെങ്കിലും യൂട്യൂബിൽ റിലീസാവുമ്പോൾ പ്രായം ആറ്​. മലയാളസിനിമയിലെ സൗണ്ട്​ എൻജിനീയറായ അനീഷ്​ പി. ജോസിന്‍റെയും വടവാതൂർ കേന്ദ്രീയവിദ്യാലയം അധ്യാപിക എമിലിൻ മാത്യുവിന്‍റെയും മകൾ. സംസാരിച്ചുതുടങ്ങുന്ന പ്രായം മുതൽ പാട്ടുകൾ മൂളിത്തുടങ്ങി ഇസബെൽ. രണ്ടര വയസ്സുമുതൽ ഗാനമേളകളിൽ പാടി. ആറുവയസ്സിനിടെ ചെറുതും വലുതുമായ മുപ്പതോളം സ്​റ്റേജുകൾ. പാട്ടിന് പുറമെ ഡാൻസ്, ചിത്രകല, അഭിനയം എന്നിവയിലും അഭിരുചിയുണ്ട്​. കോട്ടയം കേരള മ്യൂസിക്​ ക്ലബിൽ രണ്ടുമാസമായി ഓർക്കസ്​ട്രക്കൊപ്പവും പാടുന്നു​. തൃപ്പൂണിത്തുറ ആർ.എൽ.വി കോളജിൽനിന്ന്​ ബി.എ മ്യൂസിക്​ കഴിഞ്ഞ ആളാണ്​ പിതാവ്​ അനീഷ്​. എമിലിനാവട്ടെ 17 വർഷം പള്ളി ക്വയറിലെ ഗായികയുമായിരുന്നു. മൂന്നുവയസ്സുള്ളപ്പോൾ അനീഷ്​ ഇസബെല്ലിനെ സംഗീതം പഠിപ്പിച്ചുതുടങ്ങിയെങ്കിലും അടങ്ങിയിരിക്കാത്തതു​കൊണ്ട്​ പഠനം നടന്നില്ല. രണ്ടുമാസം മുമ്പുമാത്രമാണ്​ സംഗീതജ്ഞനായ ​കെ.എ. അനീഷിനു​ കീഴിൽ അഭ്യസനം തുടങ്ങിയത്​. പേരൂർ ജെ.ബി എൽ.പി സ്കൂളിൽ ഒന്നാം ക്ലാസ് വിദ്യാർഥിനിയാണ് ഇസബെൽ. മ്യൂസിക്​ പ്രൊഡക്​ഷൻ, മിക്സിങ്​, കാമറ, എഡിറ്റിങ്​ എല്ലാം നിർവഹിച്ച റിച്ചിൻ, കുഴിക്കാട് മാന്നാനം സെന്‍റ്​ എഫ്രേം സ്കൂളിലെ പ്ലസ്​ വൺ വിദ്യാർഥിയാണ്​. എട്ടാം വയസ്സുമുതൽ പിയാനോ പഠനം ആരംഭിച്ച റിച്ചിൻ ലണ്ടൻ ട്രിനിറ്റി കോളജ്​ ഓഫ്​ മ്യൂസിക്കിൽനിന്ന്​ മ്യൂസിക്കിൽ നാലാം ഗ്രേഡ്​ നേടിയിട്ടുണ്ട്​. 10 വയസ്സുമുതൽ സംഗീതം​ ചെയ്തുതുടങ്ങി. ഒപ്പം സിനിമ നിർമാണവും വിഷ്വൽ ഇഫക്ട്​സും പഠിച്ചു. 15ാം വയസ്സിലാണ്​ റിച്ചിൻ ഈ ആൽബം ചെയ്തിരിക്കുന്നത്. ഗാനത്തിന്‍റെ സംവിധാനവും സംഗീത സംവിധാനവും നിർവഹിച്ച ഗിച്ചിൻ, കുഴിക്കാട് സെന്‍റ്​ എഫ്രേം സ്കൂളിലെ എട്ടാം ക്ലാസ് വിദ്യാർഥിയാണ്​. മ്യൂസിക്​ പ്രൊഡക്​ഷനും ബീറ്റ്​ പ്രോഗ്രാമിങ്ങുമാണ്​ ഇഷ്ടവിനോദങ്ങൾ. തെള്ളകം കുഴിക്കാട്​ അധ്യാപകനായ അജി കുഴിക്കാടിന്‍റെയും പി.ഡബ്ല്യു.ഡി ഉദ്യോഗസ്ഥ വത്സല കുഴിക്കാടിന്‍റെയും മക്കളാണ്​ റിച്ചിനും ഗിച്ചിനും.