പിഴപ്പലിശ ഒഴിവാക്കി നികുതികള്‍ അടക്കാന്‍ അവസരം

ഏറ്റുമാനൂര്‍: കോവിഡ് പശ്ചാത്തലത്തില്‍ സര്‍ക്കാര്‍ ഉത്തരവിന്‍റെ അടിസ്ഥാനത്തില്‍ പിഴപ്പലിശ ഒഴിവാക്കി നികുതികുടിശ്ശിക അടക്കാന്‍ സംവിധാനമൊരുക്കി നഗരസഭ. മാര്‍ച്ച് 31 വരെയുള്ള വസ്തുനികുതി (കെട്ടിടനികുതി) കുടിശ്ശിക പിഴപ്പലിശ കൂടാതെ ഒറ്റതവണയായി അടച്ച് ജപ്തി, റവന്യൂ റിക്കവറി എന്നിവയില്‍ നിന്ന്​ ഒഴിവാകാം. വ്യാപാരസ്ഥാപനങ്ങളുടെ ലൈസന്‍സ് പിഴ കൂടാതെ പുതുക്കുന്നതിന്‍റെ കാലാവധിയും മാര്‍ച്ച് 31 വരെ നീട്ടി. ഈ സാമ്പത്തികവര്‍ഷം ലൈസന്‍സ് പുതുക്കാത്തവരുള്‍പ്പെടെ എല്ലാ വ്യാപാര-വ്യവസായ സ്ഥാപനങ്ങളും ലൈസന്‍സ് എടുക്കണം. അല്ലാതെ പ്രവര്‍ത്തിക്കുന്ന സ്ഥാപനങ്ങള്‍ക്കെതിരെ പോസിക്യൂഷന്‍ നടപടി സ്വീകരിക്കുമെന്ന് നഗരസഭ സെക്രട്ടറി അറിയിച്ചു. മാര്‍ച്ച് 31വരെ എല്ലാ പൊതു അവധി ദിവസങ്ങളിലും തൊഴില്‍ - കെട്ടിടനികുതികള്‍ നഗരസഭയില്‍ നേരിട്ട് അടക്കാം. നഗരസഭയുടെ www.taxlsgkerala.gov.in വെബ്‌സൈറ്റ് മുഖേനയും അക്ഷയ സെന്‍റര്‍ മുഖേനയും നികുതികള്‍ അടക്കാം. അതേസമയം വാര്‍ഡുകള്‍ കേന്ദ്രീകരിച്ചുള്ള ക്യാമ്പ് കലക്​ഷന്‍ ഈ വര്‍ഷം ഉണ്ടായിരിക്കില്ല. വസ്തുനികുതി (കെട്ടിടനികുതി) കുടിശ്ശിക ഇല്ലാത്തവര്‍ക്ക് ഓണ്‍ലൈനില്‍ ഉടമസ്ഥാവകാശ സര്‍ട്ടിഫിക്കറ്റ് എടുക്കാം. എന്നാല്‍, സ്ഥിരതാമസ സര്‍ട്ടിഫിക്കറ്റിന് നഗരസഭ ഓഫിസില്‍ നേരിട്ട് അപേക്ഷ നല്‍കണം.