വെട്ടിക്കാട്ടുമുക്ക്-വെള്ളൂർ റോഡ് തകർന്നു

വെട്ടിക്കാട്ടുമുക്ക്: മൂവാറ്റുപുഴയാറിന്‍റെ ഓരംചേർന്ന് പോകുന്ന വെട്ടിക്കാട്ടുമുക്ക്- വെള്ളൂർ റോഡ് കുണ്ടും കുഴിയുമായി. കായൽ കാഴ്ചകൾ കണ്ടാസ്വദിച്ച് പോകാവുന്ന വെട്ടിക്കാട്ടുമുക്ക്​ മുതൽ വെള്ളൂർ വരെയുള്ള നാല് കിലോമീറ്റർ റോഡിന്‍റെ വിവിധ ഭാഗങ്ങളിൽ വലിയ കുഴികൾ രൂപപ്പെട്ടിട്ട്​ നാളുകൾ ഏറെയായി. ഇരുചക്രവാഹന യാത്രികർക്ക് വീണ് പരിക്കേൽക്കുന്നത് നിത്യസംഭവമാണ്​. മഴ പെയ്​താൽ യാത്രാദുരിതം കഠിനമാകും. ചില ഭാഗങ്ങളിൽ പഴയ ടാറിങ് പൊങ്ങിനിലനിൽക്കുന്നുണ്ട്. കേരള പേപ്പർ പ്രോഡക്ട്സ് ലിമിറ്റഡ്, സിമന്‍റ്​ ഫാക്ടറി, റെയിൽവേ സ്​റ്റേഷൻ തുടങ്ങിയ സ്ഥലങ്ങളിലേക്ക് ടോറസടക്കമുള്ള ചെറുതും വലുതമായ നിരവധി ഭാരവണ്ടികൾ നിരന്തരം കടന്നുപോകുന്ന റോഡായതിനാൽ ആധുനിക നിലവാരത്തിൽ നിർമിച്ചാൽ മാത്രമേ ദീർഘകാലം റോഡ്​ തകരാതെ നിലനിൽക്കുകയുള്ളുവെന്ന് നാട്ടുകാർ പറയുന്നു.