പച്ചപ്പുല്ലില്ല; ക്ഷീര കർഷകരുടെ നടുവൊടിച്ച്​ വീണ്ടും കാലിത്തീറ്റ വില വർധന

കോട്ടയം: പച്ചപ്പുല്ല്​ ക്ഷാമം രൂക്ഷമായിരിക്കെ, ക്ഷീരകർഷകരെ ചൂഷണം ചെയ്ത്​ സ്വകാര്യ കാലിത്തീറ്റ കമ്പനികൾ. മാസങ്ങളുടെ ഇടവേളക്കിടെ വീണ്ടും കാലിത്തീറ്റ വിലയിൽ വർധന. കർഷകർ ഏറ്റവും കൂടുതൽ ഉപയോഗിക്കുന്ന കെ.എസ്. കാലിത്തീറ്റയുടെ വില 1445 രൂപയായിട്ടാണ് വർധിപ്പിച്ചത്. നേരത്തേ 50 കിലോ ചാക്കിന്​ 1380 രൂപയായിരുന്നു. കനത്തചൂടിൽ പുല്ലുകളെല്ലാം കരിഞ്ഞുനിൽക്കുന്നതിനാൽ കാലിത്തീറ്റയാണ്​ ഭൂരിപക്ഷം കർഷകരുടെയും ആശ്രയം. ഇതിനിടെയാണ്​ ​ വില വർധിപ്പിച്ചുള്ള കമ്പനികളുടെ ചൂഷണം. പുല്ല്​ ദൗർലഭ്യമുള്ളതിനാൽ വില ഉയർത്തിയാലും വാങ്ങാതിരിക്കാൻ കഴിയില്ലെന്ന്​​ കർഷകർ പറയുന്നു. മറ്റ്​ മാർഗമില്ലാത്തതിനാൽ വാങ്ങുമെന്ന്​ ഉറപ്പുള്ളതിനാലാണ്​ കമ്പനികൾ വില കൂട്ടിയതെന്ന്​ കർഷകർ പറയുന്നു. മറ്റ് സംസ്ഥാനങ്ങളെ അപേക്ഷിച്ച് കാലിത്തീറ്റയെ മാത്രം ആശ്രയിച്ചാണ്​ സംസ്ഥാനത്തെ ഭൂരിപക്ഷംപേരും പശുപരിപാലനം നടത്തുന്നത്​. കാലിത്തീറ്റക്കൊപ്പം ഗോതമ്പ് ഉമിയടക്കമുള്ളവക്കും ഉയർന്ന നിരക്കാണ്​ ഈടാക്കുന്നത്​. ഒരു കിലോ ഗോതമ്പിന് 26 രൂപ വിലയുള്ളപ്പോൾ, എഴുപത് ശതമാനം പോഷകങ്ങളും നീക്കിയശേഷം വിതരണം ചെയ്യുന്ന ഗോതമ്പ് ഉമിക്ക് 22 രൂപയാണ് ഈടാക്കുന്നത്. പിണ്ണാക്ക് വിലയും വർധിച്ചിട്ടുണ്ട്​. ഇൻഡസ്ട്രിയൽ വേസ്റ്റായി വരുന്ന ഗോതമ്പ് ഉമിയുടെ പേരിൽ കൊള്ളയടിക്കുന്നത്​ അവസാനിപ്പിക്കണമെന്ന്​ കർഷക കോൺഗ്രസ് ക്ഷീര സെൽ ജില്ല ചെയർമാൻ എബി ഐപ് പറഞ്ഞു. ഗുണനിലവാരമില്ലാത്ത ഉൽപന്നങ്ങൾ വിതരണം ചെയ്യുന്നതുമൂലം പാലിന്‍റെ അളവിൽ വലിയ കുറവും, കന്നുകാലികളുടെ രോഗപ്രതിരോധശേഷി ഇല്ലാതാകുകയും ചെയ്യുകയാണ്. ഈ സാഹചര്യത്തിൽ ഗുണമേന്മയുള്ള കാലിത്തീറ്റ കർഷകർക്ക് ലഭ്യമാക്കാൻ സർക്കാർ അടിയന്തര നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു. നേരത്തേ സംസ്ഥാനത്ത്​ കാലീത്തീറ്റ ഉൽപാദിപ്പിക്കുന്നതടക്കമുള്ളവ പരിഗണിക്കുമെന്ന്​ മന്ത്രി പ്രഖ്യാപിച്ചിരുന്നെങ്കിലും നടപടിയുണ്ടായില്ല. ഉൽപാദനച്ചെലവും വരുമാനവും തമ്മിൽ കൂട്ടിമുട്ടിക്കാൻ ക്ഷീര കർഷകർ പാടുപെടുമ്പോഴാണ് കാലിത്തീറ്റ വില വർധന. ബാങ്കുകളിൽനിന്ന് എടുത്ത വായ്പ തുക തിരിച്ചടയ്ക്കാൻ കഴിയാതെ പലരും ബുദ്ധിമുട്ടുകയാണ്. റബർ വിലയിടിവിനെ തുടർന്ന്​ ജില്ലയിലടക്കം നിരവധിപേർ ക്ഷീരമേഖലയിലേക്ക്​ എത്തിയിരുന്നു. ഇവർക്ക്​ പുതുസാഹചര്യം വലിയ പ്രതിസന്ധിയാണ്​ സൃഷ്ടിക്കുന്നത്​. കാലിത്തീറ്റക്ക്​ ആവശ്യക്കാരേറിയതും ഇന്ധന വില വർധനയുമാണ്​ വില വർധനക്ക്​​ കാരണമായി കമ്പനികൾ പറയുന്നത്. കാലിത്തീറ്റ നിർമിക്കുന്നതിനുള്ള അസംസ്കൃത വസ്തുക്കൾ വടക്കുകിഴക്കൻ സംസ്ഥാനങ്ങളിൽനിന്നാണ് എത്തുന്നത്. ഉത്തരേന്ത്യൻ സംസ്ഥാനങ്ങളിൽ ക്ഷീര മേഖലയിലേക്ക് കൂടുതൽ കർഷകർ എത്തിയതോടെ കാലിത്തീറ്റക്ക്​ ആവശ്യക്കാർ ഏറി. മിൽമ സംഘങ്ങളിൽ പാൽ അളക്കുന്ന കർഷകർക്ക്​ കൊഴുപ്പിന്‍റെ അടിസ്ഥാനത്തിൽ 33 രൂപ മുതൽ 38 രൂപ വരെയാണ് നൽകുന്നത്. കാലിത്തീറ്റയുടെ വില വർധനക്ക്​ ആനുപാതിമായി പാലിന് വില കൂട്ടി നൽകിയാൽ മാത്രമേ പ്രതിസന്ധി പരിഹരിക്കാനാകൂവെന്ന്​ കർഷകർ പറയുന്നു. കാലിത്തീറ്റ ചാക്കിന്​ 700 ഉള്ള സമയത്തും പാലിന് 33 രൂപയായിരുന്നുവെന്ന്​ കർഷകർ പറയുന്നു. ചാണകത്തിന് പഴയപടി ആവശ്യക്കാർ ഇല്ലാത്തതും കർഷകരെ വലക്കുന്നുണ്ട്​