​​'ദേശീയ നേതൃത്വത്തിന്‍റെ നടപടി അംഗീകരിക്കാനാകില്ല'

കോട്ടയം: ഐ.എൻ.എൽ സംസ്ഥാന കമ്മിറ്റിക്കെതിരെ ദേശീയനേതൃത്വം സ്വീകരിച്ച നടപടി അംഗീകരിക്കാനാവില്ലെന്നും ​​പ്രഫ. എ.പി. അബ്​ദുൽ വഹാബിനൊപ്പം നിലയുറപ്പിക്കുമെന്നും ജില്ലയിലെ ഒരുവിഭാഗം ഐ.എൻ.എൽ നേതാക്കൾ. സംസ്ഥാന സെക്രട്ടേറിയറ്റംഗം നജീബ്​, ജില്ല പ്രസിഡന്‍റ്​ സലീം വാഴമറ്റം എന്നിവരുടെ നേതൃത്വത്തിലൊരു വിഭാഗമാണ്​ അബ്​ദുൽ വഹാബിന്​ പിന്തുണ പ്രഖ്യാപിച്ചത്​. ഇടക്കാലത്ത്​ പാർട്ടിയിൽ അംഗത്വമെടുത്ത്​ നേതൃത്വം കൈയടക്കിയ ചിലർക്ക്​ പാർട്ടി ദേശീയനേതൃത്വം വഴങ്ങിക്കൊടുക്കുകയാണെന്ന്​ ഇവർ വാർത്തസമ്മേളനത്തിൽ ആരോപിച്ചു. ഇടതുപക്ഷത്തിനൊപ്പം കാൽനൂറ്റാണ്ടിലധികമായി ഉറച്ചുനിൽക്കുന്ന നേതാവാണ്​ വഹാബ്​. തുടർന്നും ഇതേ നിലപാട്​ സ്വീകരിക്കും. എൽ.ഡി.എഫ്​ നേതൃത്വം വഹാബിനെ തള്ളിക്കളയുമെന്ന്​ കരുതുന്നില്ല. സംസ്ഥാനത്തെയും ജില്ലയിലെയും ഭൂരിപക്ഷം പ്രവർത്തകരും ദേശീയ നേതൃത്വത്തിന്‍റെ നടപടി തള്ളുമെന്നും ഇവർ പറഞ്ഞു. സംസ്ഥാന പ്രവർത്തകസമിതിയംഗം കൊച്ചുമുഹമ്മദ്​ വല്ലത്ത്​, ജില്ല സെക്രട്ടറി റാഫി അങ്കാളം, ട്രഷറർ കെ.എ. താഹ, കാഞ്ഞിരപ്പള്ളി മണ്ഡലം പ്രസിഡന്‍റ്​ ജലാൽ കട്ടുപ്പാറ എന്നിവരും വാർത്താസമ്മേളനത്തിൽ പ​ങ്കെടുത്തു