ഹോർട്ടികോ൪പ് സംഭരിച്ച കാർഷികവിളകളുടെ വില കൊടുക്കണം -പി.സി. തോമസ്

കോട്ടയം: കർഷകരിൽനിന്ന് ഹോർട്ടികോർപ് സംഭരിച്ച കാർഷിക വിളകളുടെ ആറ് കോടി രൂപയോളം നൽകാതെ കർഷകരെ കബളിപ്പിക്കുന്നത്​ അവസാനിപ്പിക്കണമെന്നും അടിയന്തരമായി പണം നൽകണമെന്നും കേരള കോൺഗ്രസ് വർക്കിങ് ചെയർമാൻ പി.സി. തോമസ്. കർഷകർ ബുദ്ധിമുട്ടിലാണെന്നറിഞ്ഞിട്ടും സർക്കാർ നടപടി സ്വീകരിക്കുന്നില്ല. കർഷകർക്ക്​ നൽകാൻ പണമില്ല എന്ന് പ്രഖ്യാപിച്ചിരിക്കുകയാണ്. കർഷകർക്ക് നൽകാനുള്ള പണം ഉടൻ നൽകണമെന്ന്​ ആവശ്യപ്പെട്ട്​ അദ്ദേഹം മുഖ്യമന്ത്രിക്ക് ഇ-മെയിൽ സന്ദേശം അയച്ചു. മന്ത്രിയുടെ അഭിപ്രായം ദൗര്‍ഭാഗ്യകരം- എ.ഐ.ടി.യു.സി തലയോലപ്പറമ്പ്: വെള്ളൂര്‍ ന്യൂസ് പ്രിന്‍റ്​ ഫാക്ടറി സര്‍ക്കാര്‍ എറ്റെടുത്തത് തൊഴിലാളികള്‍ക്ക്​ വേണ്ടിയല്ലെന്ന് വ്യവസായ മന്ത്രിയുടെതായി വന്ന വാര്‍ത്ത ഞെട്ടിപ്പിക്കുന്നതാണെന്ന് എച്ച്.എന്‍.എല്‍ മേഖല വര്‍ക്കേഴ്‌സ് യൂനിയന്‍ (എ.ഐ.ടി.യു.സി). മൂന്നുവര്‍ഷമായി തൊഴില്‍ നഷ്ടപ്പെട്ട്​ പട്ടിണിയിലായ തൊഴിലാളികളെ ക്രൂരമായി വെല്ലുവിളിക്കുന്ന ധ്വനി ഇതിലുണ്ട്. കാഷ്വല്‍ കോണ്‍ട്രാക്ട് തൊഴിലാളികളെ കൂലിവേലക്ക്​ പോലും വെക്കാതെ ഒന്നോ രണ്ടോ ഉദ്യോഗസ്ഥന്‍മാരുമായി മന്ത്രി നടത്തുന്ന രഹസ്യനീക്കം ദുരൂഹമാണ്. ട്രേഡ് യൂനിയനുകളുമായി ആലോചിച്ച് കാര്യങ്ങള്‍ മുന്നോട്ടുകൊണ്ടുപോകുന്ന ശൈലി മന്ത്രി സ്വീകരിക്കണമെന്ന് യൂനിയന്‍ ജനറല്‍ സെക്രട്ടറി കെ.ഡി. വിശ്വനാഥന്‍ ആവശ്യപ്പെട്ടു.