രവീന്ദ്രന്‍ പട്ടയങ്ങള്‍ റദ്ദാക്കാനുള്ള തീരുമാനം സംശയാസ്പദം -എം.ഐ. രവീന്ദ്രന്‍

കോട്ടയം: രവീന്ദ്രന്‍ പട്ടയങ്ങള്‍ റദ്ദാക്കാനുള്ള തീരുമാനം അഴിമതി ലക്ഷ്യമിട്ടാണെന്ന്​ ദേവികുളം മുന്‍ അഡീ. തഹസില്‍ദാര്‍ എം.ഐ. രവീന്ദ്രന്‍. സി.പി.ഐയിലെ ഗ്രൂപ്പുവഴക്കിന്‍റെ ഭാഗമായെടുത്ത ഈ തീരുമാനത്തിന്‍റെ മറവിൽ വൻ പണപ്പിരിവിനാണ്​ കളമൊരുങ്ങുന്നതെന്നും അദ്ദേഹം വാർത്തസമ്മേളനത്തിൽ ആരോപിച്ചു. പട്ടയം റദ്ദാക്കലിന്‍റെ തുടർനടപടികൾക്ക്​ സി.പി.ഐയുടെ സർവിസ്​ സംഘടനയിൽപെട്ടവരെ മാത്രമാണ്​ നിയോഗിച്ചിരിക്കുന്നത്​. സി.പി.എം യൂനിയനിലുള്ളവരെപ്പോലും പൂർണമായി ഒഴിവാക്കി. ഇതിനുപിന്നിൽ റിസോർട്ടുകളിൽനിന്നടക്കം ഭീഷണിപ്പെടുത്തി പണംപിരിക്കാനുള്ള നീക്കമാണ്​. ഒന്നാം പിണറായി സര്‍ക്കാറിന്‍റെ കാലത്ത് ചേർന്ന സർവകക്ഷിയോഗത്തിൽ ദേവികുളം താലൂക്കിലെ രവീന്ദ്രന്‍ പട്ടയങ്ങള്‍ റെഗുലറൈസ് ചെയ്യാനായിരുന്നു തീരുമാനം. ഇത്​ നിലനിൽക്കെ, മുഖ്യമന്ത്രി സംസ്ഥാനത്ത്​ ഇല്ലാതിരുന്ന സമയത്ത്​ രവീന്ദ്രന്‍ പട്ടയങ്ങള്‍ റദ്ദ്​ ചെയ്യാൻ റവന്യൂ വകുപ്പ് ഉത്തരവിറക്കിയത്​ സംശയാസ്പദമാണ്​. പട്ടയങ്ങൾ വിതരണംചെയ്ത കാലത്ത്​ അഡീഷനല്‍ തഹസില്‍ദാറുടെ ഒഴിവിനെത്തുടർന്നാണ്​ ​ഡെപ്യൂട്ടി തഹസില്‍ദാറായിരുന്നു തനിക്ക്​ അഡീഷനല്‍ തഹസില്‍ദാരുടെ പൂർണ ചുമതല നൽകി കലക്ടർ ഉത്തരവിറക്കിയത്​. എന്നാൽ, ഇത്​ ഗസറ്റില്‍ പ്രസിദ്ധീകരിച്ചിട്ടില്ല. ഇതോടെ നിയമനത്തിന്​ സാധുത കൈവന്നില്ല. റവന്യൂ വകുപ്പിന്‍റെ ഭാഗത്തുനിന്നുണ്ടായ വീഴ്ചയാണ്​ ഇതിനുകാരണം. ഇതിന്​ താനോ പട്ടയം വാങ്ങിയവരോ ഉത്തരവാദിയല്ല. താൻ നൽകിയ പട്ടയങ്ങൾ റദ്ദാക്കാൻ ഉത്തരവിറക്കിയ റവന്യൂ വകുപ്പ്​, മുന്‍ തഹസില്‍ദാര്‍ 1970 മുതല്‍ കെ.ഡി.എച്ച് വില്ലേജില്‍ നല്‍കിയ പട്ടയങ്ങള്‍ റദ്ദാക്കാത്തത് എന്തുകൊണ്ടാണെന്ന്​ അ​ദ്ദേഹം ചോദിച്ചു. തനിക്ക് ഒരു നിയമവും മറ്റൊരാള്‍ക്ക് മറ്റൊരു നിയമവും ശരിയല്ല. ഇക്കാര്യത്തില്‍ മുഖ്യമന്ത്രി ഇടപെടണമെന്നും രവീന്ദ്രന്‍ പറഞ്ഞു.