ഉള്ളം കുളിർപ്പിക്കാൻ തണ്ണിമത്തൻ വിപണി സജീവം

കോട്ടയം: ചുട്ടുപൊള്ളുന്ന വേനൽച്ചൂടിൽ ഉള്ളം തണുപ്പിക്കാനും ദാഹം ശമിപ്പിക്കാനും തണ്ണിമത്തൻ വിപണി സജീവമായി​. ഇളംപച്ചനിറത്തിലുള്ള തമിഴ്‌നാടൻ തണ്ണിമത്തനാണ് ഈ മാസത്തോടെ ആദ്യം എത്തിത്തുടങ്ങിയത്. വേനൽച്ചൂട് വർധിക്കുന്നതോടെ ജലാംശം കൂടുതലുള്ള ഫലവർഗങ്ങൾക്ക്​ ആവശ്യക്കാരേറെയാണ്​. അതിനാൽ ഓറഞ്ച് വിപണിയിൽ സജീവമായിരുന്നു. ഓറഞ്ച്​ സീസൺ ഈമാസം അവസാനിക്കും. ഇതിന് പിന്നാലെയാണ് തമിഴ്‌നാടൻ തണ്ണിമത്തൻ വിപണി കീഴടക്കാൻ എത്തിയത്. പല നിറങ്ങളിലുള്ള തണ്ണിമത്തനുകളാണ്​ വഴിയോരങ്ങളിലെ കടകളിലേക്ക്​ ആവശ്യക്കാരെ ആകർഷിക്കാൻ ഇടംപിടിച്ചിരിക്കുന്നത്​. നഗരത്തിൽ നിരവധി സ്റ്റാളുകൾ​ പ്രത്യക്ഷപ്പെട്ടിട്ടുണ്ട്​. തണ്ണിമത്തനൊപ്പം ഷമാം, പൊട്ടുവെള്ളരി തുടങ്ങിയ പഴവർഗങ്ങൾ ചുട്ടുപൊള്ളുന്ന കാലാവസ്ഥയിൽ കഴിക്കുന്നവയാണ്​. കിലോക്ക് 30 മുതൽ 50 വരെയാണ്​ വിപണിയിൽ വിവിധ തരത്തിലെ തണ്ണിമത്ത‍ൻെറ വില. ബാംഗ്ലൂരിൽനിന്ന്​ ഇറക്കുമതിചെയ്യുന്ന കടും പച്ചനിറത്തിലുള്ള കിരൺ തണ്ണിമത്തനും വിപണിയിലുണ്ട്​. കിരൺ തണ്ണിമത്തന് 40 രൂപയാണ് കിലോക്ക് വില. സാമാന്യം വലിപ്പം കുറഞ്ഞതും മധുരം കൂടുതലും ഉള്ള തണ്ണിമത്തനാണ് കിരൺ. മഞ്ഞ തണ്ണിമത്തന്​ കിലോ 50 രൂപയാണ്​ വില. കിരണി‍ൻെറതന്നെ മറ്റൊരു ഇനമാണിത്​. ബാംഗ്ലൂരിൽ നിന്നുതന്നെയാണ്​ ഇവ കൊണ്ടുവരുന്നത്​. കോവിഡിലും തുടർച്ചയായി പെയ്ത മഴസീസണിലും പഴംവിപണിയിൽ കാര്യമായ കച്ചവടം ഉണ്ടായിരുന്നില്ലെന്ന് വ്യാപാരികൾ പറയുന്നു. എന്നാൽ, വേനൽ കടുക്കുന്നതോടെ വിപണി സജീവമാകുമെന്ന പ്രതീക്ഷയിലാണിവർ. KTL Fruits stall നാഗമ്പടം സ്​റ്റേഡിയത്തിന്​ അടുത്തായി പഴവർഗങ്ങൾ വിൽക്കുന്നവർ