മുക്കൂട്ടുതറ കേന്ദ്രമായി വൈദ്യുതി സെക്​ഷൻ വേണമെന്ന്​ ആവശ്യം

കാഞ്ഞിരപ്പള്ളി: കണമലയിൽ 33 കെ.വി. വൈദ്യുതി സബ്സ്റ്റേഷൻ സ്ഥാപിക്കണമെന്നും വിസ്തൃതമായ എരുമേലി സെക്​ഷൻ വിഭജിച്ച് മുക്കൂട്ടുതറ കേന്ദ്രമായി പുതിയത്​ സ്ഥാപിക്കണമെന്നും പൂഞ്ഞാർ നിയോജകമണ്ഡലം വൈദ്യുതി അവലോകന യോഗത്തിൽ ആവശ്യമുയർന്നു. പിണ്ണാക്കനാട് 33 കെ.വി വൈദ്യുതി സബ് സ്റ്റേഷ‍‍ൻെറ നിർമാണ പ്രവർത്തനങ്ങൾ വേഗത്തിലാക്കണമെന്നും എ.ബി.സി കേബിളുകൾ വ്യാപകമാക്കണമെന്നും യോഗം ആവശ്യപ്പെട്ടു. തീക്കോയി മാറുമല ഹൈഡ്രോ ഇലക്​ട്രിക്കൽ പ്രോജക്ടി‍ൻെറ പ്രവർത്തനം എത്രയും വേഗം കമീഷൻ ചെയ്യുവാനും നടപടി വേണമെന്ന് യോഗത്തിൽ ആവശ്യമുയർന്നു. സെബാസ്റ്റ്യൻ കുളത്തുങ്കൽ എം.എൽ.എ അധ്യക്ഷതവഹിച്ചു. പഞ്ചായത്ത്​ പ്രസിഡന്‍റുമാരായ ജോണിക്കുട്ടി മഠത്തിനകം (പാറത്തോട്), രേഖാ ദാസ് (മുണ്ടക്കയം), സിൻ ധുമോഹൻ (കോരുത്തോട്), ഗീത നോബിൾ (പൂഞ്ഞാർ), ജിജി മാത്യു (തിടനാട്), കെ.എസ്.ഇ.ബി ഉദ്യോഗസ്ഥരായ കുര്യൻ തോമസ്, സാജമ്മ, അമ്മിണി, ബെന്നി ജോസഫ്, ബാബു ജാൻ എന്നിവർ പങ്കെടുത്തു.