തിരുനക്കര, ഏറ്റുമാനൂർ ക്ഷേത്രങ്ങളിലെ ഉത്സവങ്ങൾ ഇനി പഴയ പ്രൗഢിയിൽ

കോട്ടയം: പൂരപ്രേമികളുടെയും ആനപ്രേമികളുടെയും മനംനിറച്ച്​ തിരുനക്കര, ഏറ്റുമാനൂർ ക്ഷേത്രങ്ങളിലെ ഉത്സവങ്ങൾ ഇനി പഴയ പ്രൗഢിയിൽ. കോവിഡ്​ വ്യാപനം കുറഞ്ഞതോടെയാണ്​ ഉത്സവമേളം ഉയരുന്നത്​. ആൾക്കൂട്ടം കുറച്ചാണ്​ ഇരുക്ഷേത്രങ്ങളിലും കഴിഞ്ഞ രണ്ടുവർഷവും ഉത്സവങ്ങൾ നടത്തിയിരുന്നത്​. നഗരത്തിലെ പ്രധാന ആഘോഷങ്ങളിലൊന്നാണ്​ തിരുനക്കര ഉത്സവം. ആനച്ചന്തവും വാദ്യമേളങ്ങളും കുടമാറ്റവും മിഴിവേകുന്ന തിരുനക്കര പകൽപ്പൂരമാണ്​ ഉത്സവത്തി‍ൻെറ ആവേശം. രണ്ടു തവണയും പകൽപ്പൂരം ഒഴിവാക്കിയത്​ പൂരപ്രേമികളെ നിരാശയിലാക്കിയിരുന്നു. ഇത്തവണ പകൽപ്പൂരം ഉണ്ടാവുമെന്ന വാർത്ത ഭക്തരെയൊന്നടങ്കം ആനന്ദത്തിലാക്കി. ഉത്സവത്തോടൊപ്പം കോവിഡ്​ വ്യാപനത്തിൽ നിലച്ച പഞ്ചാരിമേളവും പഞ്ചവാദ്യവും തിരികെയെത്തുന്നത്​ വാദ്യകലാകാരന്മാർക്കും പ്രതീക്ഷ നൽകുന്നു. താളംതെറ്റിയ ജീവിതം തിരികെപ്പിടിക്കാനുള്ള ശ്രമത്തിലാണ് ക്ഷേത്ര വാദ്യകലാകാരന്മാർ. ഉത്സവങ്ങളും ആഘോഷങ്ങളും ചടങ്ങ് മാത്രമായി ഒരുങ്ങിയപ്പോൾ ഏറ്റവും പ്രതിസന്ധിയിലായത് കലാകാരന്മാർ ആയിരുന്നു. മാർച്ച് 15ന് കൊടിയേറി 24ന് ആറാട്ടോടുകൂടിയാണ്​ തിരുനക്കര ഉത്സവം സമാപിക്കുന്നത്​. എട്ടാം ഉത്സവ ദിവസമായ മാർച്ച് 22ന്​ നടക്കുന്ന വലിയവിളക്ക് ദേശവിളക്കായി ആഘോഷിക്കും. മാർച്ച് 23നാണ് പകൽപ്പൂരം. കലാപരിപാടികളും ഉണ്ടാവും. മാർച്ച്​ മൂന്നുമുതൽ 12 വരെയാണ്​ ഏറ്റുമാനുർ ഉത്സവം. ഉത്സവം വിളംബരം ചെയ്യുന്ന ആചാരമായ കൊടിക്കൂറ, ​കൊടിക്കയർ സമർപ്പണവും ഘോഷയാത്രയും ഇത്തവണ ഉണ്ടാവും. മാർച്ച്​ 10നാണ്​ ഏഴരപ്പൊന്നാന. മതിൽക്കെട്ടിനുള്ളിൽ ഏഴരപ്പൊന്നാനയെ ദർശിക്കാൻ സൗകര്യമൊരുക്കും. ഒന്നാംഉത്സവം മുതൽ ആറാം ഉത്സവം വരെ മൂന്ന്​ ആനകളും ആറാം ഉത്സവം മുതൽ പത്താം ഉത്സവം വരെ അഞ്ച്​ ആനകളും എഴുന്നള്ളിപ്പിനുണ്ടാകും. 12ന്​ പേരൂർ പൂവത്തുംമൂട്ടിലെ ആറാട്ടിനു തിടമ്പ് എടുക്കുന്ന ആനക്കു പുറമേ രണ്ട്​ ആനകൾ അകമ്പടിയേകും. വീഥിയിൽ പറ സ്വീകരിക്കില്ല. ഉത്സവബലി ദർശനം നടത്താൻ ഭക്തർക്ക് അവസരം നൽകും. ഒന്നാം ഉത്സവം മുതൽ ആറാട്ടുവരെ ക്ഷേത്ര കൊടിമരച്ചുവട്ടിൽ പറവെക്കാം. ഉത്സവ നാളിൽ തിരുവരങ്ങിൽ രാത്രി 12നുശേഷം കലാപരിപാടികൾ ഉണ്ടാകില്ല. 2023ലെ ഉത്സവത്തിന്​ തൃശൂർ പൂരം മാതൃകയിൽ പകൽപ്പൂരം നടത്താനും കഴിഞ്ഞ ദിവസം ചേർന്ന അവേലാകന യോഗത്തിൽ തീരുമാനിച്ചിട്ടുണ്ട്​. കൊടിയേറ്റ് മുതൽ ആറാട്ടുവരെയുള്ള എല്ലാ ചടങ്ങുകളുടെയും പ്രവേശനം പാസ്​ മൂലം നിയന്ത്രിച്ചിരുന്നു. ആറാട്ട് എഴുന്നള്ളിപ്പിനും ഭക്തർക്ക്​ പ്രവേശനം ഉണ്ടായിരുന്നില്ല.