പൊലീസ്​-റവന്യൂഭൂമി തർക്കം: ബോർഡിന് ബദൽ കാവൽ

leeeeeeaddddddd കോട്ടയം: ജില്ല പൊലീസിന്‍റെ കൈവശ ഭൂമിയിൽ റവന്യൂ വിഭാഗം അവകാശമുന്നയിച്ച വിഷയത്തിൽ സംസ്ഥാന സർക്കാർ നയപരമായ തീരുമാനമെടുത്താൽ ​പ്രശ്നം പരിഹരിക്കാം. സംസ്ഥാനത്തൊട്ടാകെ മറ്റ്​ ജില്ലകളിലും സമാന പ്രശ്നം ഉയർന്ന സാഹചര്യത്തിലാണ്​ നയപരമായ ഇടപെടൽ തേടുന്നത്​​. ജില്ലയിൽ ഈരാറ്റുപേട്ടയടക്കം പൊലീസ്​ സ്​റ്റേഷനുകളിലും ഇതേ പ്രശ്നമുണ്ട്​. നിലവിൽ ബഹുഭൂരിപക്ഷം പൊലീസ്​ സ്​റ്റേഷനുകളും സ്ഥിതി ചെയ്യുന്നത്​ 'റവന്യൂ പുറമ്പോക്ക്​ പൊലീസ്​ കൈവശം' എന്ന പ്രമാണ ഭൂമിയിലാണ്. പൊലീസ്​ സ്​റ്റേഷന്​ സ്വന്തമായി ഭൂമിയുള്ളത്​ ചിലയിടങ്ങളിൽ മാത്രമാണ്​. ഭാവിയിൽ കൂടുതൽ സ്ഥലങ്ങളിൽ ഇത്തരം അധികാരത്തർക്കം ഉയരാനിടയുണ്ട്​​. കോട്ടയത്ത്​ പൊലീസ്​ സ്​റ്റേഷൻ വികസനത്തിനായി മാറ്റി​വെച്ച ഭൂമിയിലാണ്​ റവന്യൂ വിഭാഗം ഇലക്​ട്രോണിക്​ വോട്ടിങ്​ മെഷീൻ വെയർഹൗസിന്​ സ്ഥലം ക​ണ്ടെത്തിയതെന്നാണ്​ പൊലീസിനെ ​ചൊടിപ്പിച്ചത്​. കോട്ടയത്ത്​ ഒറ്റ സർവേ നമ്പറിലെ ഭൂമിയിലാണ്​ ഈസ്റ്റ്​ പൊലീസ്​ സ്​റ്റേഷൻ​, എസ്​.പി ഓഫിസ്​, വിജിലൻസ്​ ഓഫിസ്​, പ്ലാനിങ്​ ബോർഡ്​ ഓഫിസ്​, സി.ബി.സി.ഐ.ഡി ഓഫിസ്​ തുടങ്ങിയവയെല്ലാം സ്ഥിതിചെയ്യുന്നത്​. ഇതിൽനിന്ന്​ രണ്ടേക്കർ ഭൂമി വർഷങ്ങൾക്കുമുമ്പ്​ കോടതി സമുച്ചയം നിർമിക്കാൻ വിട്ടു​കൊടുത്തിരുന്നു. ഒരുവർഷത്തിനകം നിർമാണപ്രവൃത്തി നടത്തിയില്ലെങ്കിൽ ഭൂമി റവന്യൂ വകുപ്പിന്​ തിരിച്ചെടുക്കാമെന്നായിരുന്നു വ്യവസ്ഥ. എന്നാൽ, ഇതുവരെ നിർമാണം നടന്നിട്ടില്ല. ഈ ഭൂമി റവന്യൂ വകുപ്പിന്​ ഏറ്റെടുക്കാമെന്നിരിക്കെയാണ്​ തങ്ങളുടെ ഭൂമിയിൽ ​ബോർഡ്​ സ്ഥാപിച്ചതെന്ന്​​ പൊലീസ്​ ചൂണ്ടിക്കാട്ടുന്നു. സൈബർ പൊലീസ്​ ​സ്​റ്റേഷൻ, വനിത പൊലീസ്​ സ്​റ്റേഷൻ, ടെലി കമ്യൂണിക്കേഷൻ ഓഫിസ്​ എന്നിവ സ്ഥാപിക്കാനുള്ള ഭൂമിയാണിത്​. ഫ്ലാറ്റ്​ മാതൃകയിൽ ക്വാർട്ടേഴ്​സും നിർമിക്കാൻ പദ്ധതി നൽകിയിട്ടുണ്ട്​. നിലവിൽ ടെലി കമ്യൂണിക്കേഷൻ ഓഫിസ്​ പ്രവർത്തിക്കുന്നത്​ ടെറസിൽ ഒരുക്കിയ സൗകര്യത്തിലാണ്​. ഈ ഭൂമി നഷ്​ടപ്പെട്ടാൽ ക്വാർട്ടേഴ്​സ്​ നിർമാണം അടക്കം പ്രതിസന്ധിയിലാവുമെന്ന് പൊലീസിനെ ആശങ്കപ്പെടുത്തുന്നു​. ഭാവിയിൽ പൊലീസ്​ സ്​റ്റേഷനുമായി ബന്ധപ്പെട്ട മറ്റാവശ്യങ്ങൾക്കും ഭൂമിയില്ലാതെ വരും. അതേസമയം ഏറ്റെടുത്തത്​ റവന്യൂ ഭൂമിയാ​ണെന്ന നിലപാടിലാണ്​ കലക്ടർ. പൊലീസ്​ ക്വാർട്ടേഴ്​സിന്​ വേറെ ഭൂമി അനുവദിച്ചിട്ടുണ്ടെന്നും തെരഞ്ഞെടുപ്പ്​ കമീഷന്‍റെ നിർ​ദേശപ്രകാരമാണ്​ ബോർഡ്​ സ്ഥാപിച്ചതെന്നും കലക്ടർ പറയുന്നു. ഇക്കാര്യം ചൂണ്ടിക്കാട്ടി ലാൻഡ്​ റവന്യു കമീഷണർക്ക്​ റിപ്പോർട്ട്​​ നൽകിയിട്ടുമുണ്ട്​. റവന്യൂ നടപടിക്കെതിരെ ജില്ല പൊലീസ്​ മേധാവി സംസ്ഥാന പൊലീസ് മേധാവി വഴി തങ്ങളുടെ അവകാശമുന്നയിച്ച്​ കത്ത്​ നൽകിയിട്ടുണ്ട്​. സ്ഥലത്ത്​ പൊലീസ്​ കാവലും ഏർപ്പെടുത്തി.