ട്രെയിനിന് മുകളിൽ​ വൈദ്യുതികമ്പി പൊട്ടിവീണു; ഗതാഗതം താറുമാറായി

ഏറ്റുമാനൂര്‍ (കോട്ടയം): ഓടിക്കൊണ്ടിരുന്ന ട്രെയിനിന് മുകളിലേക്ക് വൈദ്യുതികമ്പി പൊട്ടിവീണു. തിരുവനന്തപുരത്തുനിന്ന്​ ന്യൂഡല്‍ഹിയിലേക്ക്​ പോകുകയായിരുന്ന കേരള എക്സ്​പ്രസിന്‍റെ മുൻഭാഗത്തെ ബോഗികളിലേക്കാണ്​​ പാളത്തിനുമുകളിലെ വൈദ്യുതികമ്പി പതിച്ചത്​. പൊട്ടിവീണ ഉടന്‍ വൈദ്യുതി പ്രവാഹം നിലച്ചു. ഇതോടെ 50 മീറ്ററോളം മുന്നോട്ടുപോയശേഷം ട്രെയിനും നിശ്ചലമായി. ശനിയാഴ്ച വൈകീട്ട് 4.30ഓടെ ഏറ്റുമാനൂർ, കുറുപ്പന്തറ റെയിൽവേ സ്​റ്റേഷനുകൾക്കിടയിൽ കോതനല്ലൂര്‍ റെയില്‍വേ ഗേറ്റിന് സമീപമായിരുന്നു അപകടം. എൻജിനെ വൈദ്യുതിലൈനുമായി ബന്ധിപ്പിക്കുന്ന പാൻഡോഗ്രാഫിൽ കമ്പി കുരുങ്ങുകയായിരുന്നു. അപകടത്തെതുടർന്ന്​ കോട്ടയം വഴിയുള്ള ഗതാഗതം താറുമാറായി. പിന്നീട്​ എറണാകുളത്തുനിന്ന്​ ഡീസൽ എൻജിൻ എത്തിച്ച്​ കേരള എക്സ്​പ്രസിൽ ഘടിപ്പിക്കുകയും 6.45ഓടെ ​യാത്ര പുനരാരംഭിക്കുകയുമായിരുന്നു. രണ്ടേകാൽ മണിക്കൂറോളം ട്രെയിനിൽ യാത്രക്കാർക്ക്​ കാത്തിരിക്കേണ്ടിവന്നു. ഉയർന്ന റെയിൽവേ ഉദ്യോഗസ്ഥരടക്കം സ്ഥലത്തെത്തി നടത്തിയ പരിശോധനയിൽ ഒരു കിലോമീറ്ററോളം ദൂരത്തിൽ ലൈനുകൾ പൊട്ടിവീണതായി കണ്ടെത്തി. ഇത്​ പൂർണമായി പുനഃസ്ഥാപിക്കാൻ കൂടുതൽ സമയം വേ​ണമെന്ന്​ ഉദ്യോഗസ്ഥർ പറഞ്ഞു. കാലപ്പഴക്കമാണ്​ അപകടകാരണമായി​ സംശയിക്കുന്നത്​. വൈദ്യുതി ബന്ധം നിലച്ചതിനാൽ അപകടം നടന്ന പാളത്തിലൂടെയുള്ള ഗതാഗതം മുടങ്ങിയിരിക്കുകയാണ്​. രണ്ടാംപാളത്തിലൂടെ കടത്തിവിടുന്നുണ്ടെങ്കിലും പല ട്രെയിനുകളും വൈകിയാണ്​ ഓടുന്നത്​. തൃശൂർ പുതുക്കാട്​ ഗ​ഗുഡ്​സ്​ട്രെയിൻ പാളം തെറ്റിയതിനെത്തുടർന്ന്​ സംസ്ഥാനത്തെ ട്രെയിൻ ഗതാഗതം താറുമാറായിരുന്നു. ഇത്​ പരിഹരിച്ചതിനുപിന്നാലെയാണ്​ ശനിയാഴ്ച കോതനല്ലൂരിലെ അപകടം. --പടങ്ങൾ DP--