എ.സിക്ക്​ വിപണിയിൽ ചൂടൻ വിൽപന

-പാക്കേജ്​-- കോട്ടയം: ചൂടേറിയതോടെ എ.സി വിപണിയിൽ ഉണർവ്. കോവിഡിനെത്തുടർന്ന്​ കഴിഞ്ഞ രണ്ട് സീസണിലും കച്ചവടം കുറവായിരുന്നെങ്കിലും ഇത്തവണ ജനുവരി മുതൽ എ.സി വിൽപന സജീവമായിട്ടുണ്ട്​. ഏപ്രിൽ, മേയ് മാസങ്ങളിലാണ് എ.സി വിപണി സാധാരണ സജീവമാകുന്നതെങ്കിലും ഇത്തവണ നേരത്തേ അന്വേഷണങ്ങളും വിൽപനയും ആരംഭിച്ചു. ഒരു ടണിന്‍റെ എ.സിയാണ്​ കൂടുതൽ വിറ്റുപോകുന്നത്​. ഒന്നര ടണ്ണിനും ആവശ്യക്കാരുണ്ട്​. വൈദ്യൂതി ഉപഭോഗത്തിന്​ അനുസരിച്ചുള്ള സ്റ്റാർ റേറ്റിങുകൾ അനുസരിച്ചാണ്​ വിൽപന. കുറവ്​ വൈദ്യൂതി ഉപയോഗിക്കുന്നതിനാണ്​ കൂടുതൽ ആവശ്യക്കാർ. 23,000 രൂപ മുതലാണ്​ എ.സികളുടെ വില ആരംഭിക്കുന്നത്​. ഗാരന്‍റി, വാറന്‍റി, സർവിസ്, ബ്രാൻഡ് മൂല്യം തുടങ്ങിയവയാണ് വില നിശ്ചയിക്കുന്നത്. വൈഫൈ മോഡലുകളും വിപണിയിലുണ്ട്​. ഇന്‍റർനെറ്റ് വഴി എ.സികളുടെ പ്രവർത്തനം നിയന്ത്രിക്കാമെന്നതാണ് വൈഫൈ മോഡലുകളുടെ ഗുണം. മൊബൈൽ വഴി എവിടെയിരുന്നും വീട്ടിലെ എ.സി ഓണാക്കാം. വീട്ടിലെത്തുമ്പോഴേക്കും മുറി ആവശ്യത്തിന് തണുപ്പിലെത്തിയിരിക്കും. തുടക്കകാലത്ത് വൈഫൈ മോഡലുകൾക്ക് വൻ വിലയായിരുന്നു. എന്നാലിപ്പോൾ ഇതിൽ വലിയതോതിൽ കുറവുണ്ടായിട്ടുണ്ട്​.