എച്ച്​.എൻ.എൽ: എസ്​.ബി.ഐയും സെൻട്രൽ ബാങ്ക​ും റസല്യൂഷൻ പ്ലാൻ അംഗീകരിച്ചു

കോട്ടയം: വെള്ളൂർ ഹിന്ദുസ്ഥാൻ ന്യൂസ്​പ്രിൻറ്​ ലിമിറ്റഡ്​​ (എച്ച്​.എൻ.എൽ) ഏറ്റെടുക്കുന്നതുമായി ബന്ധപ്പെട്ട്​ ഒരു കടമ്പകൂടി മറികടന്നു. സർക്കാർ നൽകിയ റസല്യൂഷൻ പ്ലാൻ എസ്​.ബി.ഐ, സെൻട്രൽ ബാങ്ക​്​ ഇന്ത്യ എന്നിവർ അംഗീകരിച്ചു. എച്ച്​.എൻ.എല്ലി​ൻെറ ബാങ്കുകൾക്കുള്ള വായ്​പ കുടിശ്ശികയിൽ 77ശതമാനവും ഇവർക്കാണ്​​ ലഭിക്കാനുള്ളത്​. ഇതോടെ ബുധനാഴ്​ച ചേരുന്ന ക്രഡിറ്റേഴ്​സ്​ കമ്മിറ്റി ഇതിന്​ ഔദ്യോഗികമായി അംഗീകാരം നൽകുമെന്നാണ്​ സൂചന. നേര​േത്ത ക്രഡിറ്റേഴ്​സ്​ കമ്മിറ്റിയിൽ ബാധ്യതകളടക്കം 278 കോടിക്ക്​ കമ്പനി ഏറ്റെടുക്കുന്ന പാക്കേജാണ്​ സർക്കാറിനെ പ്രതിനിധീകരിച്ച കിൻഫ്ര, റിയാബ്​ പ്രതിനിധികൾ അവതരിപ്പിച്ചത്​. എന്നാൽ, തുക അപര്യാപ്​തമാണെന്ന്​ കാട്ടി ക്രഡിറ്റേഴ്​സ്​ കമ്മിറ്റി ഇത്​ അംഗീകരിച്ചിരുന്നില്ല. പലിശയടക്കം 400 കോടി​േയാളം രൂപ ലഭിക്കാനുണ്ടെന്ന നിലപാടിൽ ബാങ്ക്​ പ്രതിനിധികൾ അടങ്ങിയ ക്രഡിറ്റേഴ്​സ്​ കമ്മിറ്റി ഉറച്ചുനിന്നു. എന്നാൽ, ബാങ്കുകൾ പിഴപ്പലിശയടക്കമാണ്​ ആവശ്യപ്പെടുന്നതെന്നും ഇത്​ നൽകാനാവില്ലെന്നുമായിരുന്നു​ സർക്കാർ നിലപാട്​. ഇതിനൊടുവിൽ ബാങ്കുകൾ നിലപാട്​ മയപ്പെടുത്തുകയും ഈ പാക്കേജ്​ അംഗീകരിക്കാൻ തയാറാകുകയുമായിരുന്നു. പ്ലാൻ അംഗീകരിക്കുന്നതുമായി ബന്ധപ്പെട്ട്​ നടത്തിയ വോ​ട്ടെടുപ്പിൽ എസ്​.ബി.ഐയും സെൻട്രൽ ബാങ്ക​ും അനുകൂലിച്ചു. ബുധനാഴ്​ച നടക്കുന്ന ക്രഡിറ്റേഴ്​സ്​ കമ്മിറ്റി ഇത്​ അംഗീകരിക്കുന്നതോടെ പ്രധാന കടമ്പ മറികടക്കും. തുടർന്ന്​ ഇക്കാര്യം ദേശീയ കമ്പനി നിയമ ട്രൈബ്യൂണലിനെ അറിയിക്കും. ട്രൈബ്യൂണലാകും അന്തിമ തീരുമാനം പ്രഖ്യാപിക്കുക.