അധികം കാത്തിരിക്കേണ്ടിവരില്ല; രാഷ്​ട്രീയ നിലപാട്​ ഉടൻ -ജോസ്​ കെ. മാണി

-യു.ഡി.എഫിന്​ വിമർശനം; സി.പി.എമ്മിന്​ നന്ദി -വിപ്പ​്​ ലംഘിച്ചതിന്​ ജോസഫിനും മോൻസിനുമെതിരെ നിയമനടപടി -മുന്നണി പ്രവേശത്തിൽ തീരുമാനമെടുക്കാൻ ജോസ്​ കെ. മാണിയെ ചുമതലപ്പെടുത്തി കോട്ടയം: രാഷ്​ട്രീയ നിലപാട്​ വ്യക്​തമാക്കാതെ യു.ഡി.എഫിനെ വിമർശിച്ചും സി.പി.എം​ നേതാക്കൾക്ക്​ നന്ദി അറിയിച്ചും കേരള കോൺഗ്രസ്​ (എം) ചെയർമാൻ ജോസ്​ കെ. മാണി എം.പി. ''തെറ്റുതിരുത്തിയാൽ തിരിച്ചുവരാമെന്ന്​ പറയുന്ന യു.ഡി.എഫ്​ നേതൃത്വം, ഞങ്ങൾ ചെയ്​ത തെറ്റെന്താണെന്ന്​ വ്യക്​തമാക്കണം. കേരള കോൺഗ്രസ്​ പാർട്ടിക്ക്​ ജനപിന്തുണയുണ്ടെന്ന്​ വ്യക്​തമാക്കുകയും പാർട്ടിയെ സ്വന്തം മുന്നണികളിലേക്ക്​ ക്ഷണിക്കുകയും ചെയ്ത​ േനതാക്കളോട്​ നന്ദിയുണ്ട്​. നിലവിൽ സ്വതന്ത്ര നിലപാടാണ്​​ പാർട്ടി സ്വീകരിക്കുന്നത്​. അത്​ തുടരും'' -അദ്ദേഹം പറഞ്ഞു. അവിശ്വാസപ്രമേയ ചർച്ചയിൽ വിപ്പ്​ ലംഘിച്ച്​ വോട്ട്​ ചെയ്​ത പി.ജെ. ജോസഫ്​, മോൻസ്​ ജോസഫ്​ എന്നിവർക്കെതിരെ നിയമനടപടി സ്വീകരിക്കാൻ സ്​റ്റിയറിങ്​ കമ്മിറ്റി തീരുമാനിച്ചു. ഇരുവരെയും അയോഗ്യരാക്കണമെന്നാവശ്യപ്പെട്ട്​ സ്​പീക്കർക്ക്​ പാർട്ടി വിപ്പായ റോഷി അഗസ്​റ്റിൻ കത്ത്​ നൽകുമെന്ന്​ ജോസ്​ കെ. മാണി വാർത്തസമ്മേളനത്തിൽ പറഞ്ഞു. തദ്ദേശതെരഞ്ഞെടുപ്പിനുമുമ്പ്​ പാർട്ടി രാഷ്​ട്രീയനിലപാട്​ സ്വീകരിക്കും. അധികം കാത്തിരിക്കേണ്ടി വരില്ല. ഇതുവരെ ആ​രുമായും ചർച്ച നടത്തിയിട്ടില്ല. ഒരുമുന്നണിയെയും തള്ളിപ്പറയാനുമില്ല. വിജ്​ഞാപനത്തിനുശേഷമാകും കുട്ടനാട്​ ഉപതെരഞ്ഞെടുപ്പിലെ തീരുമാനം. യു.ഡി.എഫിൽനിന്ന്​ പാർട്ടിയെ പുറത്താക്കിയതോടെയാണ്​ പാർട്ടി സ്വതന്ത്ര നിലപാട്​​ സ്വീകരിച്ചത്​​. അതിനാൽ എം.പി സ്​ഥാനം രാജിവെക്കുന്നതിനെക്കുറിച്ച്​ ചർച്ചയൊന്നുമുണ്ടായിട്ടില്ലെന്നും ജോസ്​ കെ. മാണി പറഞ്ഞു. യു.ഡി.എഫ്​ നേതൃത്വമാണ്​ ​പാലായിൽ സ്​ഥാനാർഥിയെ പ്രഖ്യാപിച്ചത്​. എന്നാൽ, കുട്ടനാട്ടിൽ എങ്ങനെ ജോസഫ്​ ഏകപക്ഷീയമായി സ്​ഥാനാർഥിയെ പ്രഖ്യാപിക്കും. എന്ത്​ അധികാരമാണ്​ ​അദ്ദേഹത്തിനുള്ളത്​. ഏത്​ പാർട്ടിയുടെ പേരിലും ചിഹ്​നത്തിലും അവർ മത്സരിക്കും. 'രണ്ടില' ചിഹ്​നത്തിൽ ഒരിക്കലും മത്സരിക്കാൻ കഴിയില്ല. പാലായിൽ ചിഹ്​നം നൽകാതിരിക്കുന്നവർക്ക്​ കാലം നൽകിയ നീതിയാണ് ഇപ്പോഴത്തെ തീരുമാനം. യു.ഡി.എഫ്​ തങ്ങളോട് അനീതി കാട്ടിയെന്ന വികാരമാണ്​ പാർട്ടിക്കുള്ളത്​. പാലായും കുട്ടനാടും മോഹിച്ച്​ ആരും ഇടതുമുന്നണിയിലേക്ക് വരേണ്ടതില്ലെന്ന മാണി സി. കാപ്പ​ൻെറ പ്രസ്​താവനയോട്​ പ്രതികരിക്കാനില്ലെന്നും ജോസ് കെ. മാണി പറഞ്ഞു നേരത്തേ സ്​റ്റിയറിങ്​ കമ്മിറ്റിയോഗത്തിൽ എൽ.ഡി.എഫിലേക്ക്​ പോകണമെന്നാവശ്യമാണ്​ കൂടുതൽപേർ ഉയർത്തിയത്​. വേഗത്തിൽ തീരുമാനമെടുക്കണമെന്നും പ്രതിനിധികൾ ആവശ്യപ്പെട്ടു. ഉചിതമായ സമയത്ത്​ ഉചിതമായ തീരുമാനമെന്നായിരുന്നു നേതൃത്വത്തി​ൻെറ മറുപടി. ഇതിനൊടുവിൽ വേഗത്തിൽ മുന്നണി പ്രവേശത്തിൽ തീരുമാനമെടുക്കാൻ യോഗം ജോസ്​ കെ. മാണിയെ ചുമതലപ്പെടുത്തി.