ചിങ്ങമാസത്തെ ചമയക്കാഴ്ചയായി തിരുനക്കരയിലെ ആനയൂട്ട്​

കോട്ടയം: തിരുനക്കര മഹാദേവർ ക്ഷേത്രത്തിൽ 34ഓളം കരിവീരന്മാർ അണിനിരന്ന ആനയൂട്ടും ഗജമേളയും ആനപ്രേമികൾക്കും കാണികൾക്കും ചിങ്ങമാസത്തെ ചമയക്കാഴ്ചയായി. തിരുവിതാംകൂർ ദേവസ്വം ബോർഡ് പ്രസിഡന്‍റ്​ എൻ. അനന്തഗോപൻ ഭദ്രദീപം പകർന്ന്​ ആരംഭംകുറിച്ചു. തുടർന്ന്​ ഗജവീരൻ തിരുനക്കര ശിവന് മന്ത്രി വി.എൻ. വാസവൻ മധുരംനൽകി ഉദ്​ഘാടനം ചെയ്തു. തന്ത്രി താഴമണ്‍മഠം കണ്ഠരര്​ മോഹനൻ മുഖ്യകാർമികത്വം വഹിച്ചു. തിരുവഞ്ചൂർ രാധാകൃഷ്ണൻ എം.എൽ.എ, ഉപദേശകസമിതി പ്രസിഡന്‍റ്​ ഗണേഷ് തുടങ്ങിയവർ ചടങ്ങിൽ പങ്കെടുത്തു. ആദ്യമായാണ്​ ഇത്രയും ആനകൾ തിരുനക്കര ക്ഷേത്രത്തിൽ ആനയൂട്ടിന്​ ഒരുമിച്ചെത്തുന്നത്​. തിരുനക്കര മഹാദേവ‍‍ൻെറ മാനസപുത്രനെന്നറിയപ്പെടുന്ന തിരുനക്കര ശിവന്‍ തന്നെയായിരുന്നു പ്രധാന ആകര്‍ഷണം. ശിവനെ ആനപ്രേമികൾ ആർപ്പുവിളികളോടെയാണ് എതിരേറ്റത്. ക്ഷേത്രമൈതാനത്തി‍ൻെറ വടക്കുഭാഗത്ത് പ്രത്യേകം തയാറാക്കിയ ബാരിക്കേഡിനുള്ളിലാണ്​ ആനകൾ അണിനിരന്നത്​. നൂറുകണക്കിന് ആനപ്രേമികൾ ആനയൂട്ട് കാണുന്നതിനായി അതിരാവിലെ മുതൽ എത്തിയിരുന്നു. ആനയൂട്ട്​ സമര്‍പ്പിക്കാനും ഭക്തര്‍ക്ക്​ അവസരമുണ്ടായിരുന്നു. നാലമ്പലത്തിൽനിന്ന്​ തീർഥശുദ്ധി വരുത്തി കി​ഴക്കേനട വഴി ഇറങ്ങിവന്ന ഓരോ ആനകളെയും പൂരത്തിന്​ സമാനമായി സവിശേഷതകൾ വിളിച്ചുപറഞ്ഞാണ്​ മൈതാനത്തേക്ക്​ ആനയിച്ചത്​. 29 കൊമ്പനാനകളും അഞ്ച്​ പിടിയാനകളും ആനയൂട്ടിൽ പങ്കെടുത്തു. ക്ഷേത്രോപദേശക സമിതിയാണ്​ സംഘടിപ്പിച്ചത്.​ ശക്തമായ ഗതാഗത നിയന്ത്രണമാണ്​ പൊലീസ്​ ഏർപ്പെടുത്തിയത്​. സുരക്ഷ കാരണങ്ങളാൽ കിഴക്കേനടയിലൂടെ മാത്രമാണ്​ ഭക്തജനങ്ങൾക്ക്​ പ്രവേശനം അനുവദിച്ചിരുന്നത്​.