പാലങ്ങൾ യാഥാർഥ്യമായി; നാട്ടുകാർ ആഹ്ലാദത്തിൽ

രാമപുരം: വർഷങ്ങളായി കാത്തിരുന്ന പാലം യാഥാർഥ്യമായതിന്റെ ആഹ്ലാദത്തിലാണ് രാമപുരം അമ്പലം ജങ്​ഷനിലെ പ്രദേശവാസികൾ. പാലം പണി പൂർത്തിയായതോടെ ഇവർക്ക് വീട്ടിലേക്കുള്ള ദൂരത്തിൽ രണ്ടു കിലോമീറ്ററോളം ലാഭിക്കാം. മാണി സി. കാപ്പൻ എം.എൽ.എയുടെ പ്രദേശിക വികസന ഫണ്ടിൽനിന്ന്​ 35 ലക്ഷത്തോളം രൂപ അനുവദിച്ചാണ് കീഴാക്കൽ കടവ് പാലം, ശാസ്താം കടവ് പാലം എന്നിവയുടെ നിർമാണം പൂർത്തീകരിച്ചത്. ഇതുവഴിയുള്ള റോഡിന്റെ കോൺക്രീറ്റിങ്ങും ഉടൻ പൂർത്തിയാക്കുമെന്ന് പാലങ്ങളുടെ സംയുക്ത ജനകീയ ഉദ്ഘാടനം നിർവഹിച്ച്​ എം.എൽ.എ പറഞ്ഞു. പഞ്ചായത്ത് പ്രസിഡന്റ് ഷൈനി സന്തോഷ് അധ്യക്ഷത വഹിച്ചു.