ഒമ്പത്​ സൗരോർജ ബോട്ടുകൾ ഒരുങ്ങുന്നു

കോട്ടയം: ജലഗതാഗതവകുപ്പിന്‍റെ കൂടുതൽ ബോട്ടുകൾ സൗരോർജത്തിലേക്ക്​. രാജ്യത്തെതന്നെ ആദ്യ സൗരോര്‍ജ ബോട്ടായിരുന്ന 'ആദിത്യ' വൻ വിജയമായതോടെ, ഘട്ടംഘട്ടമായി സൗരോർജത്തിലേക്ക്​​ മാറാൻ ജലഗതാഗത വകുപ്പ്​ തീരുമാനിക്കുകയായിരുന്നു. ഇതിന്‍റെ ഭാഗമായി സോളാർ ഉപയോഗിച്ചുള്ള ഒമ്പത്​ ബോട്ടുകളാണ്​ പുതിയതായി നിർമിക്കുന്നത്​. ആലപ്പുഴയിലെയും എറണാകുളത്തെയും യാർഡുകളിൽ ഇതിന്‍റെ നിർമാണം പുരോഗമിക്കുകയാണ്​. ഇത്​ പൂർത്തിയാകുന്നതോടെ പഴയ ബോട്ടുകൾ മാറ്റി ഇവ​ ഉപയോഗിക്കും. ജലഗതാഗത വകുപ്പ് നിലവില്‍ 56 സര്‍വിസുകളാണ്​ നടത്തുന്നുണ്ട്. ഇതെല്ലാം സോളാർ പാനലുകൾ ഉപയോഗിച്ച്​ ഓടുന്ന ബോട്ടുകളാക്കി മാറ്റും. അറുപതോളം ബോട്ടുകളാണ്​ വകുപ്പിനുള്ളത്​. 'ആദിത്യ' ഇന്ധനച്ചെലവിനത്തിൽ വലിയ ലാഭമാണ്​ വകുപ്പിനുണ്ടാക്കിയിരിക്കുന്നത്​. ആദ്യത്തെ രണ്ടരവര്‍ഷം കൊണ്ട് 38,000 കിലോമീറ്റര്‍ ദൂരം 'ആദിത്യ' സഞ്ചരിച്ചപ്പോൾ ലാഭിച്ചത് ഏകദേശം 55,000 ലിറ്റര്‍ ഡീസലെന്നായിരുന്നു വകുപ്പിന്‍റെ കണക്ക്​. ശബ്​ദ, ജല, അന്തരീക്ഷ മലിനീകരണവും ഇത്തരം ബോട്ടുകൾക്ക്​ കുറവാണ്​. ഏഴുമണിക്കൂര്‍ ചാർജ്​ ചെയ്താല്‍ ഏഴുമണിക്കൂര്‍ യാത്ര ചെയ്യാം.