സഞ്ചാരികളെ കാത്ത്​ ഹൗസ് ​ബോട്ടുകൾ; ഓണപ്രതീക്ഷയിൽ വിനോദസഞ്ചാര മേഖല

ഓണത്തിന്​ മുന്നോടിയായി വലിയതോതിൽ അന്വേഷണം എത്തുന്നു കോട്ടയം: പ്രളയത്തിൽ ഉലഞ്ഞ ഹൗസ്​ ബോട്ട്​ മേഖല ഓണക്കാത്തിരിപ്പിൽ. നീണ്ട ഇടവേളക്കുശേഷം ഹൗസ്​ ബോട്ട്​ മേഖല സജീവമാകുന്നതിനിടെയാണ്​, കഴിഞ്ഞദിവസങ്ങളിലെ പേമാരിയും വെള്ളപ്പൊക്കവും. ഇതോടെ ഹൗസ് ബോട്ടുകളുടെ ബുക്കിങ്ങുകളെല്ലാം റദ്ദായി. വെള്ളം കുറ​ഞ്ഞെങ്കിലും കാര്യമായി സഞ്ചാരികളൊന്നും വീണ്ടും എത്തിത്തുടങ്ങിയിട്ടില്ല. കുമരകത്ത് 110ഓളം ഹൗസ് ബോട്ടുകളുണ്ട്​. ഇതില്‍ ചിലത്​ മാത്രമാണ്​ കഴിഞ്ഞ ദിവസങ്ങളില്‍ കായല്‍യാത്ര നടത്തിയത്. ബോട്ടുകൾക്കൊപ്പം ഹോട്ടലുകൾക്കും റിസോര്‍ട്ടുകൾക്കും വെള്ളപ്പൊക്കം തിരിച്ചടിയായിരുന്നു. പേരിനു മാത്രമാണ്​ ഇപ്പോൾ ഇവിടേക്ക്​ സഞ്ചാരികൾ എത്തുന്നത്​. ഓണത്തോടുബന്ധിച്ച ബുക്കിങ്ങുകളിലാണ് ഇവരുടെ കാത്തിരിപ്പ്​. ഓണത്തിന്​ മുന്നോടിയായി വലിയതോതിൽ അന്വേഷണങ്ങൾ എത്തുന്നുണ്ട്​. മികച്ച കാലാവസ്ഥയാണെങ്കിൽ മെച്ചമെന്നാണ്​​ ബോട്ട്​ ഉടമകളും ജീവനക്കാരും പറയുന്നത്​. നിയന്ത്രണങ്ങളില്ലാത്തതിനാൽ ഓണക്കാലത്ത്​ ധാരാളം സഞ്ചാരികൾ എത്തുമെന്നാണ്​ ഇവരുടെ കണക്കുകൂട്ടൽ. കോവിഡിനെ തുടർന്ന്​ കഴിഞ്ഞ രണ്ട്​ ഓണക്കാലങ്ങൾ വിനോദസഞ്ചാര മേഖലക്ക്​ നിരാശയുടേതായിരുന്നു. ഇത്തവണ ഓണക്കാലത്ത്​ കുമരകം അടക്കം വിനോദസഞ്ചാര മേഖലകളിൽ വൻ ഉണർവാണ്​ പ്രതീക്ഷിക്കുന്നതെന്ന്​ ടൂറിസം വകുപ്പ്​ അധികൃതരും പറയുന്നു. ആഭ്യന്തര സഞ്ചാരികളുടെ തിരക്കാണ്​​ എല്ലാ വിനോദസഞ്ചാര കേന്ദ്രങ്ങളിലും പ്രതീക്ഷിക്കുന്നത്​. കോവിഡ്​ നിയന്ത്രണങ്ങൾ നീക്കിയിട്ടും ചുരുക്കം വിദേശ വിനോദസഞ്ചാരികള്‍ മാത്രമാണ്​ കുമരകമടക്കം സ്ഥലങ്ങളിലേക്ക്​ എത്തുന്നത്. ആഭ്യന്തര വിനോദ സഞ്ചാരികളാണ്​ ഇപ്പോൾ മേഖലയെ സജീവമാക്കുന്നത്​. അന്തർസംസ്ഥാനങ്ങളില്‍നിന്ന്​ കൂടുതലായി സഞ്ചാരികൾ എത്തുന്നുണ്ട്​. ദീപാവലി അവധിക്കാലത്താകും ഇവരുടെ ഒഴുക്ക്​ വർധിക്കുക. ഓണക്കാലത്ത്​ മലയാളികളായ സഞ്ചാരികളാകും കൂടുതൽ എത്തുകയെന്നും ബോട്ടുടമകൾ പറയുന്നു. എന്നാൽ, മലയാളികളിൽ ഭൂരിഭാഗവും കായല്‍യാത്ര നടത്തി അന്നുതന്നെ മടങ്ങുന്നതാണ്​ പതിവ്​. വാഗമൺ അടക്കം വിനോദസഞ്ചാര കേന്ദ്രങ്ങളും പ്രതിസന്ധിയിലാണ്​. പ്രകൃതിക്ഷോഭങ്ങള്‍ മൂലം ആഭ്യന്തര സഞ്ചാരികളുടെ വരവ്​ നിലച്ചതാണ്​ രംഗത്തെ പ്രതിസന്ധിയിലാക്കുന്നത്. ഇവരും ഓണക്കാലത്തെയാണ്​ പ്രതീക്ഷയോടെ ഉറ്റുനോക്കുന്നത്​.