യൂത്ത് കോൺഗ്രസ് നേതാക്കൾക്ക്​ സി.പി.എം പഞ്ചായത്ത് അംഗത്തിന്‍റെ നേതൃത്വത്തിൽ മർദനം

തൃക്കൊടിത്താനം പൊലീസ് കേസെടുത്തു ചങ്ങനാശ്ശേരി: തൃക്കൊടിത്താനം​ മണികണ്ഠവയലിൽ സി.പി.എം പഞ്ചായത്ത് അംഗത്തിന്‍റെ നേതൃത്വത്തിലുള്ള സംഘം അർധരാത്രി വീട്ടിൽ അതിക്രമിച്ചുകയറി യൂത്ത് കോൺഗ്രസ് നേതാക്കളെ ക്രൂരമായി മർദിച്ചതായി പരാതി. ജില്ല സെക്രട്ടറി മനുകുമാറിനും ബ്ലോക്ക് ജനറൽ സെക്രട്ടറി ആ​ന്‍റോ ആന്‍റണിക്കുമാണ്​ മർദനമേറ്റത്​. സി.പി.എമ്മിന് സ്വാധീനമുള്ള പ്രദേശത്ത് യൂത്ത് കോൺഗ്രസ് യൂനിറ്റ് രൂപവത്​കരിച്ച്​ പ്രവർത്തനങ്ങൾ സജീവമാക്കിയതിന്‍റെ പേരിൽ മുമ്പും ഇവർക്ക് നേരെ ആക്രമണം നടന്നതായി പറയുന്നു. വ്യാഴാഴ്ച ഈ പ്രദേശത്ത് നടന്ന സംസ്കാര ചടങ്ങിൽ മനുവും ആന്‍റോയും സജീവമായി പങ്കെടുത്തിരുന്നു. ഇതിൽ പ്രകോപിതനായ പഞ്ചായത്ത് അംഗം ബൈജു വിജയൻ രാത്രി 11.30ഓടെ മനുവിന്‍റെ വീട്ടിലെത്തുകയും അശ്ലീലം പറഞ്ഞ്​ കൈയേറ്റം ചെയ്യുകയായിരുന്നത്രെ. ബൈജുവും സംഘവും മടങ്ങിയതിന്​ പിന്നാലെ മനു തൃക്കൊടിത്താനം പൊലീസിൽ വിവരമറിയിച്ചു. പൊലീസ് വന്നതറിഞ്ഞ് ബൈജു കൂടുതൽ പ്രവർത്തകരെയും കൂട്ടി എത്തുകയും വീട് വളഞ്ഞ് ഈസമയം അവിടെയുണ്ടായിരുന്ന ആന്‍റോ ആന്‍റണിയെയും തടയാനെത്തിയ മനു കുമാറിനെയും മർദിച്ചതായും പറയുന്നു. പൊലീസ് നോക്കിനിൽക്കെ കമ്പിവടി ഉപയോഗിച്ചാണ് ഇവർ ആക്രമിച്ചതെന്ന്​ പറയുന്നു. ശബ്ദം കേട്ട് നാട്ടുകാർ എത്തിയപ്പോഴാണ് ഇവരെ ആശുപത്രിയിലെത്തിക്കാൻ പൊലീസ് തയാറായത്. ജനറൽ ആശുപത്രിയിൽ എത്തിച്ച ഇവരുടെ പരിക്ക് ഗുരുതരമാണെന്ന്​ ബോധ്യപ്പെട്ടതോടെ കോട്ടയം മെഡിക്കൽ കോളജിലേക്ക് മാറ്റുകയായിരുന്നു. ആന്റോയുടെ കൈക്ക്‌ പൊട്ടലും നെഞ്ചത്ത്‌ ചതവുമുണ്ട്‌. മനു കുമാറിന്റെ തലക്കും നടുവിലുമാണ് പരിക്ക്. സംഭവത്തിൽ തൃക്കൊടിത്താനം പൊലീസ് കേസെടുത്തു.