മഴ: നിയന്ത്രണങ്ങൾ തിരിച്ചടിയായെന്ന്​ വിനോദ സഞ്ചാര വകുപ്പ്​

തൊടുപുഴ: മഴ കനത്തതോടെ വിവിധ ജില്ലകളിലെ വിനോദസഞ്ചാര കേന്ദ്രങ്ങളുടെ പ്രവർത്തനം പെട്ടെന്ന്​ നിർത്തിവെച്ചത്​ തിരിച്ചടിയായെന്ന്​ വിനോദസഞ്ചാര വകുപ്പ്​. റിസോർട്ടുകളും ഹോട്ടലുകളും മുൻകൂട്ടി ബുക്ക്​​ ചെയ്ത്​ അന്തർസംസ്ഥാനങ്ങളിൽനിന്നെത്തിയ നിരവധി സഞ്ചാരികൾ സംസ്ഥാനത്തെ നിയന്ത്രണങ്ങളെത്തെുടർന്ന്​ ദുരിതത്തിലായി. വിഷയത്തിൽ അടിയന്തര ഇടപെടൽ വേണമെന്ന്​ വകുപ്പ്​ അധികൃതർ സർക്കാറിനോട്​ ആവശ്യപ്പെട്ടിട്ടുണ്ട്​. മ​ഴ ശക്തമാകുകയും പലയിടങ്ങളിലും മണ്ണിടിച്ചിൽ ഉണ്ടാകുകയും ചെയ്ത സാഹചര്യത്തിലാണ്​ മൂന്നാർ ഉൾപ്പെടെ പ്രധാന കേന്ദ്രങ്ങളിലെല്ലാം ഇനിയൊരു അറിയിപ്പുണ്ടാകുന്നതു​വരെ വിനോദസഞ്ചാരം നിർത്തിവെക്കാൻ കലക്ടർമാർ ഉത്തരവായത്​. മാസങ്ങൾക്ക്​ മുമ്പ്​ ഹോട്ടലുകളും റിസോർട്ടുകളും ബുക്ക്​ ചെയ്ത​ ഇതര സംസ്ഥാനങ്ങളിൽനിന്നുള്ള സഞ്ചാരികൾ കേരളത്തിൽ എത്തിയ ഉടനെയാണ്​ അപ്രതീക്ഷിത പ്രഖ്യാപനം​. ബോട്ടിങ്​ ഉൾപ്പെടെ പ്രവർത്തനങ്ങൾക്ക്​ വിലക്ക്​ ഏർപ്പെടുത്തിയാലും മുൻകൂട്ടി ബുക്ക്​ ചെയ്ത്​ എത്തിയവരെ റിസോർട്ടുകളിലേക്ക് പോകാനും അവിടങ്ങളിൽ താമസിക്കാനും അനുവദിക്കണമെന്നാണ്​ ആവശ്യം. അടുത്ത ദിവസങ്ങളിൽ നിരവധി ബുക്കിങ്ങുകൾ റദ്ദായതോടെ ഇങ്ങനെയുള്ള സഞ്ചാരികൾക്കെങ്കിലും പ്രത്യേക പരിഗണന നൽകണമെന്ന്​ റിസോർട്ട്​ ഉടമകളും ആവശ്യപ്പെടുന്നു. മുന്‍കൂട്ടി റിസോർട്ട്​ ബുക്ക്​ ചെയ്ത്​ പണമടച്ച പലരും കേരളത്തിലെത്തി താമസിക്കാനെങ്കിലും താൽപര്യം കാണിക്കുന്നുണ്ട്​. എന്നാൽ, കടുത്ത നിയന്ത്രണങ്ങൾ മൂലം ഇവർക്ക്​ താമസസ്ഥലത്തേക്ക്​ പോകാൻപോലും കഴിയാത്ത സാഹചര്യമാണ്​ പലയിടത്തുമുള്ളത്​. നിയന്ത്രണം പ്രഖ്യാപിച്ചതറിഞ്ഞ്​ ഒട്ടേറെ പേർ ബുക്കിങ്​ റദ്ദാക്കിയതായും ഇവർ സമീപഭാവിയിൽ കേരളത്തിലേക്ക്​ വരാൻ മടിക്കുമെന്നും വിനോദസഞ്ചാര വകുപ്പ്​ ഉദ്യോഗസ്ഥരും പറയുന്നു. വിഷയം ജില്ല കലക്ടർമാരുടെയും ​സർക്കാറിന്‍റെയും ശ്രദ്ധയിൽപെടുത്തിയിട്ടുണ്ട്​. ഈ സാഹചര്യത്തിൽ നിയന്ത്രണങ്ങളിൽ ചില ഇളവുകൾ ഉണ്ടായേക്കുമെന്നാണ്​ പ്രതീക്ഷ. പി.പി. കബീർ