പാലായിൽ ദീർഘദൂര ബസുകൾ കൂട്ടത്തോടെ മുടങ്ങി

പാലാ: ഡീസൽക്ഷാമത്തെ തുടർന്ന് പാലാ ഡിപ്പോയിൽനിന്നുള്ള ഭൂരിഭാഗം സർവിസുകളും മുടങ്ങി. 50 ശതമാനം ഓർഡിനറി സർവിസുകൾ മാത്രമേ മുടങ്ങൂ എന്നായിരുന്നു അറിയിപ്പെങ്കിലും ദീർഘദൂര സൂപ്പർക്ലാസ് സർവിസുകളായ കൊന്നക്കാട്, പഞ്ചിക്കൽ, അമ്പായത്തോട്, കുടിയാന്മല റൂട്ടുകളിലോടുന്ന എക്സ്പ്രസ്, സൂപ്പർഫാസ്റ്റ് സർവിസുകളും മുടങ്ങി. ഇതേതുടർന്ന് നിരവധി യാത്രക്കാരാണ്​ പെരുവഴിയിലായത്​. കെ.എസ്.ആർ.ടി.സി മാത്രം സർവിസ് നടത്തുന്ന ദേശസാത്​കൃത റൂട്ടുകളിലെ യാത്രക്കാരാണ് ദുരിതത്തിലായത്. യാത്രതടസ്സം ഒഴിവാക്കാൻ അടിയന്തര ഇടപെടൽ ഉണ്ടാവണമെന്ന് പാസഞ്ചേഴ്സ് അസോ. ചെയർമാൻ ജയ്സൺ മാന്തോട്ടം അധികൃതരോട് അവശ്യപ്പെട്ടു.