കക്കി-ആനത്തോട് ഡാമിന്‍റെ ഷട്ടറുകള്‍ ഇന്ന്​ തുറക്കും

പത്തനംതിട്ട: വൃഷ്ടിപ്രദേശങ്ങളിൽ നീ​രൊഴുക്ക്​ ശക്തമായ കക്കി-ആനത്തോട് ഡാമിന്‍റെ നാല് ഷട്ടർ തിങ്കളാഴ്ച തുറക്കും. സംസ്ഥാന റൂൾ ലെവൽ മോണിറ്ററിങ്​ കമ്മിറ്റിയുടെ നിർദേശം അനുസിച്ചാണ്​ നടപടി. രാവിലെ 11ന് ശേഷം ക്രമമായി ഉയര്‍ത്തി 30 ക്യുമെക്‌സ് മുതല്‍ 100 ക്യുമെക്‌സ് വരെ ജലം ജനവാസ മേഖലകളില്‍ പരമാവധി 15 സെന്‍റീമീറ്ററില്‍ കൂടുതല്‍ ജലനിരപ്പ് ഉയരാതെ പമ്പാനദിയിലേക്ക് ഒഴുക്കിവിടാനാണ്​ തീരുമാനം. പുറത്തേക്ക് ഒഴുകുന്ന ജലം പമ്പാനദിയിലൂടെ ഏകദേശം രണ്ടു മണിക്കൂറിനു ശേഷം പമ്പ ത്രിവേണിയിലും ആറ് മണിക്കൂറിനു ശേഷം റാന്നിയിലും എത്തിച്ചേരും. അപകടസാധ്യതയുള്ള മേഖലകളില്‍ താമസിക്കുന്ന എല്ലാ ആളുകളെയും ക്യാമ്പുകളിലേക്ക് മാറ്റാൻ റവന്യു അധികൃതർ നടപടി തുടങ്ങി. റിസർവോയറി​ന്‍റെ സംഭരണശേഷി 981.46 മീറ്ററാണ്. ആഗസ്റ്റ് 10 വരെ സംഭരിക്കാന്‍ അനുവദിക്കപ്പെട്ട പരമാവധി ജലനിരപ്പ് 975.75 മീറ്ററാണ്. ഞായറാഴ്ച പുലർച്ച ഒന്നിന്​ റിസര്‍വോയറിന്‍റെ ജലനിരപ്പ് 975.25 മീറ്ററില്‍ എത്തിയതിനെ തുടർന്ന്​ റെഡ് അലര്‍ട്ട് പ്രഖ്യാപിച്ചിരുന്നു.