ഇടുക്കി അണക്കെട്ട്​ തുറന്നു

ചെറുതോണി: കനത്ത മഴയിൽ ജലനിരപ്പ്​ ഉയർന്നതിനെത്തുടർന്ന്​ എട്ട്​ മാസത്തിനുശേഷം ഇടുക്കി അണക്കെട്ട്​ വീണ്ടും തുറന്നു. ഇടുക്കി ജലവൈദ്യുതി പദ്ധതിയുടെ ഭാഗമായ ചെറുതോണി അണക്കെട്ടിന്‍റെ മൂന്ന്​ ഷട്ടറാണ്​ മൂന്ന്​​ തവണയായി തുറന്നത്​. ഇതുവഴി സെക്കൻഡിൽ 100 ഘനയടി (ഒരു ലക്ഷം ലിറ്റർ) വെള്ളമാണ്​ പെരിയാറിലേക്ക്​ ഒഴുക്കുന്നത്​. ജലവിഭവ മന്ത്രി റോഷി അഗസ്റ്റിന്‍റെയും ഡാം സുരക്ഷ വിഭാഗം അധികൃതരുടെയും സാന്നിധ്യത്തിൽ ഞായറാഴ്ച രാവിലെ പത്തിനാണ്​ അണക്കെട്ട്​ തുറന്നത്​. ശക്തമായ നീരൊഴുക്കും മുല്ലപ്പെരിയാർ ഡാം തുറന്നുവെച്ചിരിക്കുന്നതും മൂലം ഇടുക്കി ഡാമിലെ ജലനിരപ്പ്​ ഉയർന്നതോടെയാണ്​ മുൻകരുതലിന്‍റെ ഭാഗമായി തുറക്കാൻ തീരുമാനിച്ചത്​. രാവിലെ 9.55ന് ആദ്യസൈറൺ മുഴങ്ങി. 10ന്​​ മൂന്നാമത്തെ സൈറണും മുഴങ്ങിയതോടെ മൂന്നാം നമ്പർ ഷട്ടർ 75 സെ.മീ ഉയർത്തി. റെഡ്​ അലർട്ടിലുള്ള ഡാമിൽ ഈ സമയം ജലനിരപ്പ്​ 2384.22 അടിയായിരുന്നു. ജലം ചെറുതോണി പാലത്തിലെത്താൻ 28 മിനിറ്റ് വേണ്ടി വന്നു. ഇവിടെ നിന്ന്​ കരിമ്പൻ ചപ്പാത്തിലൂടെ ലോവർപെരിയാർ അണക്കെട്ടിലും അവിടെ നിന്ന് ഭൂതത്താൻകെട്ട് ഡാമിലൂടെ മലയാറ്റൂർ, കാലടി, ആലുവവഴി വരാപ്പുഴ കായലിലുമെത്തി. വൈകീട്ട്​ 4.20ന്​ മൂന്നാം ഷട്ടർ 75 സെ.മീയിൽനിന്ന്​ 120 സെ.മീ ആക്കി ഉയർത്തുകയും 4.45ന് ​ഇത്​ 70 സെ.മീയിലേക്ക്​ താഴ്ത്തുകയും ചെയ്തു. 4.45ന്​ രണ്ടാമത്തെയും അഞ്ചിന്​ നാലാമത്തെയും ഷട്ടർ 40 സെ.മീ വീതം ഉയർത്തി. ഞായറാഴ്ച വൈകീട്ടത്തെ കണക്ക്​ പ്രകാരം 2384.72 അടി വെള്ളമാണ്​ അണക്കെട്ടിലുള്ളത്​. ഇത്​ സംഭരണശേഷിയുടെ 79.09 ശതമാനമാണ്​. 13ാം തവണയാണ്​ ഡാം തുറക്കുന്നത്​. കഴിഞ്ഞ ഡിസംബർ ഏഴിനാണ്​ അവസാനം തുറന്നത്​. തുറക്കുന്നതിന്​ മുന്നോടിയായി രാവിലെ തന്നെ ഇടുക്കി ഡാം മുതൽ ചെറുതോണിവരെ പൊലീസിനെ വിന്യസിച്ചിരുന്നു. ആംബുലൻസും അഗ്​നിരക്ഷാസേനയും സജ്ജമാക്കി. ഡാം തുറക്കുന്ന ഗേറ്റിന്‍റെ മുൻഭാഗത്ത് സന്ദർശകർക്ക് കർശനവിലക്ക് ഏർപ്പെടുത്തിയിരുന്നു. ഡാം തുറക്കുമ്പോൾ പെരിയാർ തീരത്തെ വീടുകളിൽ വെള്ളം കയറില്ലെന്ന് മുൻകൂട്ടി ഉറപ്പാക്കി. മുൻകരുതലായി 79 കുടുംബങ്ങൾക്ക് മാറിത്താമസിക്കാൻ നോട്ടീസ് നൽകിയിരുന്നു. ചിത്രങ്ങൾ: TDG Idukki Dam 1, TDG Idukki Dam 2 ഇടുക്കി അണക്കെട്ടിന്‍റെ ഭാഗമായ ചെറുതോണി ഡാമിന്‍റെ മൂന്നാം നമ്പർ ഷട്ടർ ഞായറാഴ്ച രാവിലെ തുറന്നപ്പോൾ ചിത്രം: ടെൻസിങ്​ പോൾ TDG Idukki Dam 3, TDG Idukki Dam 4 ഇടുക്കി അണക്കെട്ടിന്‍റെ ഭാഗമായ ചെറുതോണി ഡാമിന്‍റെ മൂന്ന്​ ഷട്ടറും തുറന്ന നിലയിൽ ചിത്രം: ടെൻസിങ്​ പോൾ