അയ്​മനം ഒളോക്കരി പാടശേഖരത്തില്‍ റിങ്​ ബണ്ട്​ തകര്‍ന്നു

അയ്​മനം: പഞ്ചായത്തിലെ ഒളോക്കരി പാടത്ത് വെള്ളിയാഴ്ച രാത്രി റിങ്​ ബണ്ട് പൊട്ടി 70 ദിവസം പിന്നിട്ട നെൽപാടത്ത് വെള്ളം കയറി. കഴിഞ്ഞ ദിവസം മടവീഴ്ച ഉണ്ടായെങ്കിലും കർഷകരുടെ കഠിനാധ്വാന ഫലമായി മട ഇട്ട് രക്ഷിച്ച പാടത്താണ് തൊട്ടടുത്ത ദിവസം റിങ് ബണ്ട് പൊട്ടി വെള്ളം കുതിച്ചുകയറിയത്​. രാത്രി നിരീക്ഷണത്തിന് ഏർപ്പെടുത്തിയിരുന്ന കർഷകരാണ്​ വടക്കേ പുറംബണ്ടിലെ റിങ് ബണ്ട് പൊട്ടിയത് കണ്ടെത്തിയത്​. ശനിയാഴ്ച പുലർച്ചയോളം നീണ്ട കഷ്ടപ്പാടിനൊടുവിൽ പൊട്ടിപ്പോയ റിങ് ബണ്ട് പുനർനിർമിച്ച് 380 ഏക്കറിലെ കൃഷി സംരക്ഷിച്ചു. പാടത്തിന്റെ നാലുപുറം ബണ്ടുകളിലായി 70 കുടുംബങ്ങൾ പാർക്കുന്നുണ്ട്. നെൽകൃഷി സംരക്ഷിക്കുന്നതിനൊപ്പം പുറംബണ്ടിലെ ജനങ്ങൾക്കും സംരക്ഷണം നൽകാൻ കർഷകരുടെ പ്രയത്നത്താൽ സാധിച്ചു.