പെയ്​​തൊഴിയാതെ മഴയും ദുരിതവും

കോട്ടയം: ജില്ലയുടെ മലയോര മേഖലയിൽ മഴ വീണ്ടും കനത്തു. കിഴക്കൻ വെള്ളത്തിന്‍റെ വരവ്​ ശക്തമായതോടെ പടിഞ്ഞാറൻ മേഖല വെള്ളത്തിലാണ്​. താഴ്ന്ന പ്രദേശങ്ങളിൽനിന്ന്​ ആളുകളെ മാറ്റിപ്പാർപ്പിച്ചു. ആയിരത്തിലധികം പേരാണ്​ ദുരിതാശ്വാസ ക്യാമ്പുകളിൽ കഴിയുന്നത്​. കോട്ടയം താലൂക്കിലാണ്​ ഏറ്റവുമധികം ക്യാമ്പുകളുള്ളത്​. മഴ മാറിനിന്നാലേ പടിഞ്ഞാറൻ പ്രദേശങ്ങളിൽ വെള്ളം ഇറങ്ങൂ. മലയോരത്തുനിന്ന്​ കൂടുതൽ വെള്ളം എത്തി മീനച്ചിലാറും കൈവഴികളും കരകവിഞ്ഞുകിടക്കുകയാണ്​. ഒറ്റപ്പെട്ടയിടങ്ങളിൽ അതിതീവ്ര മഴക്കുള്ള സാധ്യതയുള്ളതിനാൽ വ്യാഴാഴ്ച കേന്ദ്ര കാലാവസ്ഥ വകുപ്പ് ജില്ലയിൽ റെഡ് അലർട്ട് പ്രഖ്യാപിച്ചിരുന്നു. ശക്തമായ മഴക്ക്​ സാധ്യതയുള്ളതിനാൽ വെള്ളിയാഴ്ച ജില്ലയിൽ യെ​ല്ലോ അലർട്ടും പ്രഖ്യാപിച്ചിട്ടുണ്ട്. ജനങ്ങൾ അതിജാഗ്രത പാലിക്കണമെന്ന് കലക്ടർ അറിയിച്ചു. മീനച്ചിലാറ്റിൽ ചേരിപ്പാട്​, പേരൂർ, നീലിമംഗലം, നാഗമ്പടം, കുമരകം എന്നിവിടങ്ങളിൽ ജലനിരപ്പ്​ അപകടനില മറികടന്നു. മണിമലയാറ്റിലും ജലനിരപ്പ്​ ഉയരുകയാണ്​. മൂവാറ്റുപുഴയാർ നിറഞ്ഞതിനെത്തുടർന്ന്​ വൈക്കത്തും നിരവധി വീടുകളിൽ വെള്ളം കയറി. കുമരകം: കണ്ണാടിച്ചാല്‍, കോന്നക്കരി, മറ്റീത്ര ഭാഗങ്ങളിലെ പല വീടുകളിലും വെള്ളം കയറി. കുമരകം പെട്രോള്‍ പമ്പില്‍ വെള്ളം കയറിയതിനാല്‍ പമ്പിന്‍റെ പ്രവര്‍ത്തനം താല്‍ക്കാലികമായി നിര്‍ത്തി. കോട്ടയം-കുമരകം റോഡില്‍ ചെങ്ങളം, ആമ്പക്കുഴി, ഇല്ലിക്കല്‍ ഭാഗങ്ങളില്‍ വെള്ളം കയറിയെങ്കിലും ഗതാഗതം ഇപ്പോഴും തുടരുന്നുണ്ട്. മറ്റീത്രയിൽ വെള്ളം കയറിയ സ്ഥലങ്ങൾ വാര്‍ഡ് മെംബര്‍ സ്മിത സുനില്‍ സന്ദര്‍ശിച്ചു. lead