വട്ടവടയിൽ ഭൂമി ഇടിഞ്ഞു; വീടുകൾ അപകടാവസ്ഥയിൽ

ലക്ഷക്കണക്കിന്​ രൂപയുടെ കൃഷിനാശം മൂന്നാർ: വട്ടവടയിൽ കഴിഞ്ഞ ദിവസങ്ങളിൽ പെയ്ത കനത്ത മഴയിൽ ഒരേക്കറിലധികം കൃഷിഭൂമി 50 മീറ്ററോളം നീളത്തിൽ ഇടിഞ്ഞു. മേഖലയിൽ അഞ്ച്​ ഹെക്ടറിലധികം പ്രദേശത്ത്​ കൃഷിനാശമുണ്ടായിട്ടുണ്ട്​. കർഷകർക്ക്​ ലക്ഷക്കണക്കിന്​ രൂപയുടെ നഷ്ട​മാണ്​ സംഭവിച്ചത്​. ഓണത്തിന്​ വിളവെടുക്കാൻ ലക്ഷ്യമിട്ട്​ കൃഷി ചെയ്തിരുന്ന കിഴങ്ങ്​, ക്യാരറ്റ്​, ബീൻസ്​ എന്നിവയാണ്​ പ്രധാനമായും നശിച്ചത്​. വെള്ളം കയറിയ കൃഷിയിടങ്ങളിലെ കിഴങ്ങും ക്യാരറ്റും അഴുകിയും ഫംഗസ്​ ബാധിച്ചും ഉപയോഗശൂന്യമാകുന്നതിനാൽ വിൽക്കാനാവില്ല. നാശനഷ്ടം വിലയിരുത്താൻ കൃഷി വകുപ്പ്​ അധികൃതർ സ്ഥലം സന്ദർശിച്ചു. കഴിഞ്ഞദിവസം വൈകീട്ട്​ ആറോടെയാണ്​ സ്വാമിനാഥൻ എന്ന കർഷകന്‍റെ ഉടമസ്ഥതയിലുള്ള കൃഷിഭൂമി ഇടിഞ്ഞ്​​​ ഗർത്തം രൂപപ്പെട്ടത്​. ഇതോടെ, സമീപത്തെ നാല്​ വീടുകൾ അപകടഭീഷണിയിലായി. അധികൃതർ അടിയന്തരമായി ഇടപെട്ടില്ലെങ്കിൽ​ പെട്ടിമുടിയിലേതിന്​ സമാന്തരമായ ദുരന്തം ഇവിടെയും ആവർത്തിക്കുമെന്നാണ്​ നാട്ടുകാർ പറയുന്നത്​. വിളവെടുപ്പിന്​ പാകമായ ബീൻസ്​ അടക്കം കൃഷി ചെയ്തിരുന്ന ഭൂമിയാണ്​ അപ്രതീക്ഷിതമായി ഇടിഞ്ഞത്​. ഇനിയും ഭൂമി ഇടിഞ്ഞാൽ സമീപത്തെ വീടുകൾ പൂർണമായി തകരുന്ന അവസ്ഥയാണ്​. വട്ടവട സ്വദേശികളായ ഗോപാലൻ, മോഹൻ, അയ്യപ്പൻ തുടങ്ങിയവരുടെ വീടുകളാണ്​ അപകടഭീഷണി നേരിടുന്നത്​. ചിത്രം: TDG Vattavada കനത്ത മഴയിൽ വട്ടവടയിലെ കൃഷിഭൂമി ഇടിഞ്ഞ നിലയിൽ