റോഡ്​ നിർമാണം തടഞ്ഞ വനംവകുപ്പ്​ ഉദ്യോഗസ്ഥർക്ക്​ സസ്​പെൻഷൻ

തൊടുപുഴ: റോഡ്​ നിർമാണം തടയുകയും നിർമാണ സാമഗ്രികൾ പിടിച്ചെടുക്കുകയും ചെയ്ത സംഭവത്തിൽ രണ്ട്​ വനം വകുപ്പ്​ ഉദ്യോഗസ്​ഥർക്ക്​ സസ്​പെൻഷൻ. ഇടുക്കി, എറണാകുളം ജില്ലകളെ തമ്മിൽ ബന്ധിപ്പിക്കുന്ന പൈങ്ങോട്ടൂർ-മുള്ളരിങ്ങാട്​ റോഡിന്‍റെ നിർമാണപ്രവർത്തനങ്ങൾ തടഞ്ഞതുമായി ബന്ധപ്പെട്ട്​ മുള്ളരിങ്ങാട്​ സെക്​ഷൻ ഫോറസ്റ്റ്​ ഓഫിസർ എം. അജയ്​ഘോഷ്​, ബീറ്റ്​ ഫോറസ്റ്റ്​ ഓഫിസർ കെ.എ. ഷമീർ എന്നിവരെയാണ്​ അന്വേഷണ വിധേയമായി സസ്​പെൻഡ്​​ ചെയ്തത്​. മുള്ളരിങ്ങാട്​ റേഞ്ചിൽപ്പെട്ട ചാത്തമറ്റം-മറ്റക്കണ്ടം പൊതുമരാമത്ത് റോഡിന്‍റെ നിർമാണമാണ്​ വനംവകുപ്പിന്‍റെ ഇടപെടലിനെത്തുടർന്ന്​ വിവാദമായത്​. റോഡ്​ നിർമാണത്തിനിടെ തേക്ക്​ തോട്ടങ്ങളിൽ മൂന്നിടത്ത്​ അടിക്കാട്​ തെളിച്ച്​ മണ്ണ്​ നിരപ്പാക്കിയെന്ന്​ ചൂണ്ടിക്കാട്ടി ജെ.സി.ബിയും ഡ്രൈവറെയും കസ്റ്റഡിയിൽ എടുക്കുകയായിരുന്നു. ഡ്രൈവറുടെ മൊഴി എടുക്കുന്നതിനിടെ നാട്ടുകാർ സ്ഥലത്ത്​ സംഘടിച്ചെത്തിയതോടെ സംഘർഷാവസ്ഥയായി. മാത്യുകുഴൽനാടൻ എം.എൽ.എയുടെ നേതൃത്വത്തിൽ ഡ്രൈവറെ ബലമായി മോചിപ്പിക്കുകയും ചെയ്തിരുന്നു. ഈ സംഭവത്തിൽ പൊലീസ്​ അന്വേഷണം തുടരുകയാണ്​. നിസ്സാര പ്രശ്നങ്ങൾ രമ്യമായി പരിഹരിക്കുന്നതിന്​ പകരം പൊതുജനങ്ങളും ജനപ്രതിനിധികളും സ്ഥലത്ത്​ എത്തുന്ന ഗുരുതര സാഹചര്യം സൃഷ്ടിച്ചത്​ ബന്ധപ്പെട്ട ഉദ്യോഗസ്ഥരുടെ വീഴ്ചയാണെന്ന അഡീഷനൽ പ്രിൻസിപ്പൽ ചീഫ്​ ഫോറസ്റ്റ്​ കൺസർവേറ്ററുടെ റിപ്പോർട്ടിന്‍റെ അടിസ്ഥാനത്തിലാണ്​ രണ്ട്​ പേരെ സസ്​പെൻഡ്​​ ചെയ്തത്​. പൊതുമരാമത്ത്​ വകുപ്പ്​ ഫണ്ട്​ അനുവദിച്ചത്​ പ്രകാരം നടന്ന റോഡ്​ അറ്റകുറ്റപ്പണി വനംവകുപ്പ്​ ജീവനക്കാർ അകാരണമായി തടസ്സപ്പെടുത്തി എന്നാണ്​ വകുപ്പുതല വിലയിരുത്തൽ. ജീവനക്കാർക്കെതിരായ ആരോപണങ്ങൾ ഗൗരവമേറിയതും പ്രഥമദൃഷ്ട്യാ കഴമ്പുള്ളതുമാണെന്നും സസ്​പെൻഷൻ ഉത്തരവിൽ പറയുന്നു.