ഭക്ഷണം വാങ്ങാനെങ്കിലും ഈ വാതിലൊന്ന് തുറന്നുകൂടെ...!

ഗാന്ധിനഗർ: രോഗികൾക്കും കൂട്ടിരിപ്പുകാർക്കും സൗജന്യമായി സന്നദ്ധ സംഘടനകൾ നൽകുന്ന ഭക്ഷണം വാങ്ങുവാൻപോലും സമ്മതിക്കാതെ മെഡിക്കൽകോളജ് അധികൃതർ കാൻസർ വാർഡി‍ൻെറ ഇടതുവശത്തുള്ള ഗേറ്റ് പൂട്ടി. ഇതോടെ സന്നദ്ധ സംഘടനകൾ നൽകുന്ന ഭക്ഷണം വാങ്ങാൻ രോഗികളുടെ കൂട്ടിരിപ്പുകാർ വലയുകയാണ്​. നൂറുകണക്കിന് പാവപ്പെട്ട രോഗികളുടെ സഹായികളാണ് രാവിലെയും ഉച്ചക്കും ഭക്ഷണം വാങ്ങാൻ ഇവിടെ എത്തിക്കൊണ്ടിരിക്കുന്നത്. ഒരു സംഘടന നാലുദിവസവും മറ്റൊരു സംഘടന മൂന്നുദിവസവും പ്രഭാതഭക്ഷണവും ഉച്ചഭക്ഷണവും വർഷങ്ങളായി നൽകിവരുന്നു. ഈ ഭാഗത്തെ ചെറിയ ഗേറ്റ്​ തുറന്ന് റോഡിലിറങ്ങിയാണ് ഭക്ഷണം വാങ്ങിയിരുന്നത്. വാതിൽ പൂട്ടിയതോടെ ആശുപത്രിയുടെ ഉള്ളിൽനിന്ന്​ ഗേറ്റി‍ൻെറ കമ്പികൾക്കിടയിലൂടെ പാത്രം നൽകിയും വാങ്ങാൻ ശ്രമിക്കുന്നു. ഇതുമൂലം പാത്രം ചരിഞ്ഞ് ഭക്ഷണം നഷ്ടപ്പെടുന്നുമുണ്ട്​. വിതരണ സ്ഥലത്തേക്ക്​ അല്ലാതെ എത്തണമെങ്കിൽ അരകിലോമീറ്ററിൽ കൂടുതൽ ചുറ്റി കറങ്ങണ്ടിവരും. ഗൈനക്കോളജി വിഭാഗത്തിൽനിന്നുള്ളവർ റോഡിലൂടെ വന്നാണ്​​ ഭക്ഷണംവാങ്ങുന്നത്​. ഇങ്ങനെ രണ്ടുഭാഗത്തുനിന്ന്​ എത്തുന്നവരുടെ സൗകര്യത്തിനായി ഗേറ്റിന്​ സമീപം ഭക്ഷണം വിതരണം നടത്തുന്നത്. മഴയുള്ളപ്പോൾ ഭക്ഷണവിതരണം തടസ്സപ്പെടുകയും ചെയ്യുന്നു. തുടർച്ചയായി ഡയാലിസിസിന് വിധേയമാകുന്ന നിരവധി രോഗികൾ ഈ ഭാഗത്ത് വാടകവീട്ടിലാണ് താമസിച്ചുവരുന്നുണ്ട്​. ഇവർക്ക് ഈ ഗേറ്റ്​ കടന്ന് വളരെയെളുപ്പം ആശുപത്രിയിലെത്തി ചികിത്സതേടാനുള്ള സൗകര്യമാണ് ഗേറ്റ്​ അടച്ചതോടെ നഷ്ടമായത്. ഇപ്പോൾ ആശുപത്രിയിലെത്താൻ ഇവർക്ക് മറ്റു വാഹനങ്ങളെ ആശ്രയിക്കേണ്ടിവരുന്നു. കഴിഞ്ഞദിവസം ആശുപത്രിയിൽനിന്ന്​ കൊണ്ടുപോയ മാലിന്യത്തിൽ നവജാത ശിശുവി‍ൻെറ ജഡം കണ്ടെത്തിയ സംഭവവുമായി ബന്ധപ്പെട്ടാണ് ഈ കവാടം അടച്ചതെന്നാണ് അറിയുന്നത്. രോഗികൾക്ക് ആശുപത്രിയിലെത്തുന്നതിനും ഭക്ഷണവിതരണ സമയത്തും ഈ കവാടം തുറന്നുകൊടുക്കാൻ അധികൃതർ തയാറാകണമെന്നും സുരക്ഷ ഉദ്യോഗസ്ഥരെ ഇവിടെ നിയമിക്കണമെന്നുമുള്ള ആവശ്യം ശക്തമാണ്​. പടം: KTL Gate മെഡിക്കൽ കോളജ് കാൻസർ വാർഡി‍ൻെറ ഇടതുവശത്തെ ഗേറ്റ്​ പൂട്ടിയതിനാൽ ഭക്ഷണം വാങ്ങാനെത്തിയവരുടെ തിരക്ക്​