നാഗമ്പടം മൈതാനത്ത് കുന്നുകൂടി മാലിന്യം: ഗതികേടിൽ വഴിയാത്രികർ

കോട്ടയം: നഗരത്തിലെ നാഗമ്പടം മൈതാനത്ത് മാലിന്യം കുന്നുകൂടിയിട്ടും നീക്കാന്‍ നടപടിയില്ല. പോപ്പ് മൈതാനത്ത് നഗരത്തിലെ വിവിധ ഭാഗങ്ങളില്‍നിന്നും നഗരസഭ ശേഖരിക്കുന്ന മാലിന്യമാണ് കൂട്ടിയിട്ടിരിക്കുന്നത്. ഈ മാലിന്യം ഇവിടെ കിടന്ന് അഴുകുന്നതല്ലാതെ കൃത്യമായി സംസ്‌കരിക്കാന്‍ നഗരസഭ തയാറാകുന്നില്ല. ബ്യൂട്ടിപാര്‍ലറുകള്‍, ഭക്ഷണ വേസ്റ്റുകള്‍ തുടങ്ങി വിവിധതരം മാലിന്യങ്ങളാണ് ഇവിടെ ചാക്കില്‍കെട്ടി തള്ളിയിരിക്കുന്നത്. മാലിന്യങ്ങൾ അഴുകി ദുര്‍ഗന്ധം വമിക്കുന്ന അവസ്ഥയാണ്​. മാലിന്യം പക്ഷികളും തെരുവുനായ്​ക്കളും വലിച്ചിഴക്കുന്നതും സ്ഥിരം കാഴ്ചയാണ്​. നാഗമ്പടം ബസ്​സ്റ്റാന്‍ഡിലേക്ക് എളുപ്പത്തിലെത്താന്‍ യാത്രക്കാർ പോപ്പ് മൈതാനം ഉപയോഗിക്കുന്നുണ്ട്. കൂടാതെ പോപ്പ് മൈതാനത്ത് ഡ്രൈവിങ് പരിശീലനം നടത്തുന്നവരുമുണ്ട്. പഴയ മാലിന്യ നിര്‍മാര്‍ജന കേന്ദ്രവും, തുമ്പൂര്‍മുഴി മാലിന്യ സംസ്‌കരണകേന്ദ്രവും സമീപം​ ഉണ്ടെങ്കിലും ഇതൊന്നും പ്രവര്‍ത്തിക്കാറില്ല. മാലിന്യം നിര്‍മാർജനം ചെയ്യാനും ജനങ്ങളുടെ ബുദ്ധിമുട്ട്​ ഒഴിവാക്കാനും ബന്ധപ്പെട്ടവര്‍ തയാറാകണമെന്ന ആവശ്യം ശക്തമാണ്. KTL Ground waste നാഗമ്പടം മൈതാനത്തിൽ മാലിന്യം കുന്നുകൂടിയ നിലയിൽ leadable