വിശദ നഗരാസൂത്രണ പദ്ധതി: കോട്ടയം നഗരസഭയിൽ പ്രത്യേക സമിതി

കോട്ടയം: വിശദ നഗരാസൂത്രണ പദ്ധതി ഭേദഗതി ചെയ്യാൻ ശിപാർശകൾ സമർപ്പിക്കാൻ കോട്ടയം നഗരസഭ പ്രത്യേക സമിതി രൂപവത്​കരിച്ചു. തിങ്കളാഴ്ച ചേർന്ന കൗൺസിൽ യോഗത്തിലാണ്​ തീരുമാനം. ചെയർപേഴ്​സൻ, സെക്രട്ടറി, ടൗൺപ്ലാനർ ഓഫിസർ, സ്റ്റാൻഡിങ്​ കമ്മിറ്റി അധ്യക്ഷർ എന്നിവർക്കുപുറമേ എൽ.ഡി.എഫിൽനിന്ന്​ അഡ്വ. ഷീജ അനിൽ, എം.എസ്​. വേണുക്കുട്ടൻ, യു.ഡി.എഫിൽനിന്ന്​ ടി.സി. റോയി, എം.എ. ഷാജി, ബി.ജെ.പിയിൽനിന്ന്​​ ടി.ആർ. അനിൽകുമാർ, വിനു ആർ.മോഹൻ എന്നീ കൗൺസിലർമാരും സമിതി അംഗങ്ങളാണ്​. വിശദ നഗരാസൂത്രണ പദ്ധതി സംബന്ധിച്ച്​ 23ന്​ കിലയിൽ നടക്കുന്ന യോഗത്തിൽ ചെയർപേഴ്സനും സെക്രട്ടറിയും പ​ങ്കെടുക്കും. തുടർന്നാകും മുനിസിപ്പൽ തലത്തിലെ യോഗങ്ങൾ. വിശദ നഗരാസൂത്രണ പദ്ധതി രൂപവത്​കരണവും അനുമതി നൽകലും ചട്ടപ്രകാരം ആറു സ്കീമുകളിൽ നിലവിലെ വികസനങ്ങൾ പരിഗണിച്ച്​ എന്തൊക്കെ മാറ്റങ്ങൾ വേണമെന്നാണ്​ സമിതി ചർച്ചചെയ്യുക. സോൺ മാറ്റമടക്കം ഇതിൽ വരും. ജനങ്ങളുടെ പരാതികളും ആവശ്യങ്ങളും കേട്ടാകും തീരുമാനമെടുക്കുക. കൗൺസിൽ യോഗത്തിൽ മുനിസിപ്പൽ എൻജിനീയർ പ​ങ്കെടുക്കാതിരുന്നതിൽ എൽ.ഡി.എഫ്​ അംഗങ്ങൾ പ്രതിഷേധിച്ചു. 'എൻജിനീയർ പ​ങ്കെടുക്കാതിരുന്നത്​ ഗുരുതര അലംഭാവം' കോട്ടയം: വിശദ നഗരാസൂത്രണ പദ്ധതിയുടെ ഡി.ടി.പി സ്കീം ചർച്ചചെയ്യാൻ ചേർന്ന പ്രധാന കൗൺസിൽ യോഗത്തിൽ മുനിസിപ്പൽ എൻജിനീയറോ അസി. എക്സിക്യൂട്ടീവ്​ എൻജിനീയറോ പ​ങ്കെടുക്കാതിരുന്നത്​ ഗുരുതര അലംഭാവമാണെന്ന്​ പ്രതിപക്ഷനേതാവ്​ അഡ്വ. ഷീജ അനിൽ ആരോപിച്ചു. വ്യക്തിപരമായ കാരണങ്ങളാൽ പ​ങ്കെടുത്തില്ലെന്നാണ്​ ഭരണസിമിതി പറയുന്നത്​. എന്നാൽ, നഗരത്തെ മുഴുവൻ ബാധിക്കുന്ന, ടൗൺപ്ലാനറും ഉദ്യോഗസ്ഥരും പ​ങ്കെടുത്ത യോഗത്തിൽ എൻജിനീയർ എത്താതിരുന്നത്​ നഗരത്തിലെ ജനങ്ങ​ളോടുള്ള അവഗണനയാണെന്നും ഷീജ അനിൽ പറഞ്ഞു.