കുമരകത്ത്​ വഴിയോരങ്ങൾ കൈയടക്കി തെരുവുനായ്ക്കൾ

കുമരകം: കൂട്ടമായി അലയുന്ന തെരുവുനായ്ക്കൾ കുമരകം പഞ്ചായത്തിന്‍റെ വിവിധ ഭാഗങ്ങളിൽ വഴിയാത്രകാർക്ക് ഭീഷണിയാകുന്നു. അട്ടിപ്പീടിക റോഡിലും ഗവ. ഹോസ്പിറ്റിൽ പരിസരത്തും കോണത്താറ്റ് പാലത്തിന്​ സമീപവും ഇവയുടെ ശല്യം അതിരൂക്ഷമാണ്. രാവിലെ നടക്കാനിറങ്ങുന്നവർക്കും വിദ്യാർഥികൾക്കുമാണ് ഏറെ ശല്യം. ബൈക്കുകൾക്ക്​ പിന്നാലെ നായ്ക്കൂട്ടം ഓടുന്ന സംഭവങ്ങളും പതിവാണ്. ഇവയിൽനിന്ന്​ രക്ഷപ്പെടാൻ അതിവേഗം ഓടിച്ച് അപകടങ്ങളിൽ പെടുന്നവരുമുണ്ട്. ഗവ.ഹൈസ്കൂൾ പരിസരങ്ങളിൽ തെരുവുനായ്ക്കൾ വിഹരിക്കുകയാണ്. വിദ്യാർഥികൾ ഏറെ ഭയന്നാണ് സ്കൂളിലെത്തുന്നത്​. ഒരു വാഹനം പോയാൽ മറുവശത്ത് കാൽനടപോലും അസാധ്യമായ കോണത്താറ്റ് പാലവും പരിസരവും നായ്ക്കളുടെ വിഹാരകേന്ദ്രമാണ്. നടപ്പാത നായ്ക്കൾ കൈയടക്കിയതോടെ വഴിനടക്കാനാകാതെ ബുദ്ധിമുട്ടുകയാണ് നാട്ടുകാർ. വന്ധ്യംകരണം നടത്തുന്നുണ്ടെങ്കിലും നായ്ക്കൾ പെരുകുകയാണ്​. വന്ധ്യംകരണത്തിനായി പിടിച്ചുകൊണ്ടുപോകുന്നവയെ തിരിച്ച്​ അതേസ്ഥലത്ത് തന്നെ തിരിച്ചുവിടണമെന്നാണ് നിയമം. എന്നാൽ, ഇത് പാലിക്കപ്പെടുന്നില്ലെന്നും ഇവയെ കൂട്ടമായി ഒരേസ്ഥലത്ത് തന്നെ ഇറക്കിവിടുന്നതാണ് ഇവ സംഘം ചേരുന്നതിന് കാരണമെന്നും പറയപ്പെടുന്നു. ഗവ.ഹൈസ്കൂൾ ഭാഗത്ത് മാത്രം അമ്പതോളം തെരുവുനായ്ക്കളാണ് അലഞ്ഞുതിരിയുന്നത്.