എരുമേലിയിൽ വിഭാവനം ചെയ്യുന്നത്​ സംസ്ഥാനത്തെ ഏറ്റവും നീളമേറിയ റൺവേ

കോട്ടയം: നിർദിഷ്ട എരുമേലി വിമാനത്താവളത്തി​ൽ വിഭാവനം ചെയ്യുന്നത്​ 3500 മീറ്റർ നീളമുള്ള റൺവേ. ഇത്​ യാഥാർഥ്യമായാൽ സംസ്ഥാനത്തെ ഏറ്റവും നീളമേറിയ റൺവേയാകും എരുമേലിയിലേത്​. സംസ്ഥാന സർക്കാർ പദ്ധതി തത്ത്വത്തിൽ അംഗീകരിച്ചതോടെ പുതിയ സാമ്പത്തിക, സാ​ങ്കേതിക സാധ്യത പഠനം ഉടൻ തുടങ്ങും​. നെടുമ്പാശ്ശേരിയിൽ​ 3400 മീറ്ററും കണ്ണൂരിൽ 3050 മീറ്റർ നീളവുമുള്ള റൺവേകളാണുള്ളത്​. 2.7 കിലോമീറ്ററിനാണ്​ ഇവി​ടെ നേരത്തേ സ്ഥലം കണ്ടെത്തിയിരുന്നത്​. എന്നാൽ, നോഡൽ ഏജൻസിയായകേരള സംസ്ഥാന വ്യവസായ വികസന കോർപറേഷനും (കെ.എസ്​.ഐ.ഡി.സി) യു.എസ്​ കൺസൽട്ടൻസി ലൂയി ബഗ്​റും ചേർന്നു തയാറാക്കിയ സാ​ങ്കേതിക സാധ്യതാപഠനറിപ്പോർട്ടിൽ കേന്ദ്ര വ്യോമയാനമന്ത്രാലയം ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍റെ (ഡി.ജി.സി.എ)അഭിപ്രായം തേടിയിരുന്നു. ഇതിനുള്ള മറുപടിയിൽ ഭൂമിശാസ്ത്രപരമായ പിഴവുകൾ ഡി.ജി.സി.എ ചൂണ്ടിക്കാട്ടിയിരുന്നു. ഡി.ജി.സി.എ സൂചിപ്പിച്ച പ്രധാന പ്രശ്നങ്ങളിലൊന്നായിരുന്നു റൺവേക്ക്​ നീളം പോര എന്നത്. രാജ്യാന്തര വിമാനത്താവളത്തിന്​​ 3000 മീറ്റർ നീളമുള്ള റൺവേ വേണം​. ചട്ടം അനുസരിച്ച്​ റൺവേ തയാറാക്കാൻ സ്ഥലത്തിന് വീതിയും നീളവുമില്ല. മംഗലാപുരത്തിനും കോഴിക്കോടിനും സമാന സാഹചര്യമാണിവിടെയെന്നും കേന്ദ്ര വ്യോമയാന മന്ത്രാലയത്തിന്​ നൽകിയ മറുപടിയിൽ പറഞ്ഞിരുന്നു. അതോടെയാണ്​ ഈ പ്രശ്നം പരിഹരിക്കാൻ രണ്ടാമതും സർവേ നടത്തിയത്​. ചെന്നൈയിലെ ജിയോ ഐഡി എന്ന കമ്പനിയാണ്​ ഒബ്​സ്റ്റക്കിൾ ലിമിറ്റേഷൻ സർഫസ്​ സർവേ വഴി റൺവേ​ക്ക്​ പുതിയ സ്ഥലം ക​ണ്ടെത്തിയത്​. ഏതു ദിശയിലേക്കും വിമാനം ഉയരാനും ഇറങ്ങാനും ഉള്ള സൗകര്യം ഇവിടെയുണ്ട്​. ലൂയി ബഗ്​ർ ആണ്​ ഡ്രോൺ ഉപയോഗിച്ച്​ സാമ്പത്തിക സാ​ങ്കേതിക സർവേ നടത്തുക. തുടർന്ന്​ റിപ്പോർട്ട്​ ​കെ.എസ്​.ഐ.ഡി.സിക്ക്​ നൽകും. സംസ്ഥാന സർക്കാറിന്‍റെ അനുമതിയോടെ കേന്ദ്ര വ്യോമയാനമന്ത്രാലയത്തിനും എയർ​പോർട്ട്​ അതോറിറ്റിക്കും റിപ്പോർട്ട്​ കൈമാറും. ചെറുവള്ളി എസ്​റ്റേറ്റി​ന്‍റെ 2263.18 ഏക്കർ ഭൂമിയാണ്​ വിമാനത്താവളത്തിനായി സർക്കാർ കണ്ടെത്തിയിരിക്കുന്നത്​. ഭൂമിയുടെ ഉടമസ്​ഥാവകാശം സംബന്ധിച്ച ബിലീവേഴ്​സ്​ ചർച്ചുമായി നടക്കുന്ന കേസ്​ കോടതിയുടെ പരിഗണനയിലാണ്​. സ്ഥലമെടുപ്പിനുള്ള വിജ്ഞാപനം സർക്കാർ നേരത്തേ പുറത്തിറക്കിയിരുന്നു. കഴിഞ്ഞ ബജറ്റിൽ വിമാനത്താവളത്തിന്‍റെ സാധ്യതാപഠനത്തിനും ഡി.പി.ആർ. തയാറാക്കുന്നതിനും രണ്ടുകോടി രൂപ അനുവദിച്ചിരുന്നു. കെ.എസ്​.ഐ.ഡി.സിക്കാണ് വിമാനത്താവളത്തിന്‍റെ നിർമാണച്ചുമതല​.