യാത്രക്കാർ കൈകാണിച്ചു;പാലരുവി ഏറ്റുമാനൂരിൽ നിർത്തി

കോട്ടയം: താൽക്കാലിക സ്​റ്റോപ്​ പിൻവലിച്ചതറിയാതെ ഏറ്റുമാനൂർ സ്​റ്റേഷനിലെത്തിയ യാത്രക്കാർ കൈ കാണിച്ചതോടെ പാലരുവി എക്സ്​​പ്രസ്​ നിർത്തി. തിങ്കളാഴ്ച രാവിലെയാണ്​ സംഭവം. ഇരട്ടപ്പാത നിർമാണത്തോടനുബന്ധിച്ചുള്ള റെയിൽവേ നിയന്ത്രണങ്ങളുടെ ഭാഗമായി ഞായറാഴ്ച വരെ പാലരുവിക്ക്​ ഏറ്റുമാനൂരിൽ സ്​റ്റോപ് അനുവദിച്ചിരുന്നു. നിയന്ത്രണങ്ങളും താൽക്കാലിക സ്​റ്റോപ്പും പിൻവലിച്ചതറിയാതെ ഏറ്റുമാനൂരിൽ എത്തിയപ്പോഴാണ് സ്​റ്റോപ് ഇല്ലെന്ന വിവരം യാത്രക്കാർ അറിയുന്നത്. പ്രതീക്ഷ കൈവിടാതെ കൈ കാണിച്ച യാത്രക്കാർക്ക് മുന്നിൽ പാലരുവി അൽപനിമിഷം നിർത്തി കയറാൻ അനുവദിച്ചു. വിഷയം ചർച്ചയായതോടെ ലോക്കോ പൈലറ്റിന് നന്ദി പറയുകയാണ്​ യാത്രക്കാർ. ലോക്കോ പൈലറ്റിന്‍റെ സമീപനം പ്രശംസനീയമാണെന്ന് ഏറ്റുമാനൂർ അസോസിയേഷൻ പ്രതിനിധി ശ്രീജിത്ത് കുമാർ അഭിപ്രായപ്പെട്ടു. എറണാകുളത്ത്​ ഓഫിസ് സമയത്തെത്തുന്ന ട്രെയിനാണ് പാലരുവി. സർക്കാർ, അർധസർക്കാർ സ്ഥാപനങ്ങളിലെ ജീവനക്കാരടക്കം ദിവസവും ആയിരങ്ങളാണ് കോട്ടയം ഭാഗത്തു നിന്നു യാത്ര ചെയ്യുന്നത്. പേട്ട, പാലാ, അയർക്കുന്നം, പേരൂർ, ആർപ്പുക്കര, നീണ്ടൂർ, മണർകാട്, വയല എന്നിവിടങ്ങളിൽനിന്ന് എളുപ്പം എത്തിച്ചേരാൻ കഴിയുന്ന സ്​റ്റേഷനാണ് ഏറ്റുമാനൂർ. പാലരുവി തുടങ്ങിയ സമയത്ത് ഏറ്റുമാനൂർ സ്​റ്റേഷന്റെ പണി നടക്കുന്നതിനാൽ സ്​റ്റോപ് താൽക്കാലികമായി ഒഴിവാക്കുകയായിരുന്നു. പാലരുവി പിന്നീട് പുനലൂരിൽനിന്ന് തിരുനെൽവേലി വരെ നീട്ടിയപ്പോൾ ഏറ്റുമാനൂരിലെ സ്​റ്റോപ് സ്വപ്നം മാത്രമായി. കോട്ടയം ഇരട്ടപ്പാത പൂർത്തിയായതോടെ സ്​റ്റോപ് യാഥാർഥ്യമായേക്കുമെന്നാണ്​ വിവരം. ഇരട്ടപ്പാതയുടെ നിയന്ത്രണങ്ങൾക്ക് അനുഭാവം പ്രകടിപ്പിച്ച് പാലരുവിക്കുവേണ്ടി നടത്തിവരുന്ന പ്രതിഷേധങ്ങൾ നിർത്തി വെച്ചിരിക്കുകയായിരുന്നു. ഇരട്ടപ്പാത കമീഷൻ ചെയ്യുമ്പോൾ ലാഭിക്കുന്ന സമയം സ്​റ്റോപ് അനുവദിക്കുന്നതിന് അനുകൂലമാണെന്നും റെയിൽവേ ഇനിയും ഏറ്റുമാനൂരിന്റെ യാത്രാക്ലേശം കണ്ടില്ലെന്ന് ഭാവിച്ചാൽ തുടർ സമരങ്ങളുമായി മുന്നോട്ടു പോകുമെന്നും ഏറ്റുമാനൂർ പാസഞ്ചർ അസോസിയേഷൻ ഭാരവാഹികളായ അജാസ് വടക്കേടം, എം.എസ്​. ഷിനു എന്നിവർ അറിയിച്ചു.