കിടങ്ങൂരിൽ ബൈക്ക് അപകടം; മൂന്നുതോട്ടില്‍ വാൻ മറിഞ്ഞു

പാലാ: രണ്ട്​ വ്യത്യസ്ത അപകടങ്ങളിൽ ഒരാൾക്ക്​ പരിക്ക്​. ഏറ്റുമാനൂര്‍-പൂഞ്ഞാര്‍ സംസ്ഥാനപാതയില്‍ കിടങ്ങൂരിനടുത്ത് കോയിത്തറപ്പടിയിലും കിടങ്ങൂര്‍-ഉഴവൂര്‍ റോഡില്‍ മൂന്നുതോടിന് സമീപവുമാണ് അപകടമുണ്ടായത്. കോയിത്തറപ്പടിയില്‍ ഞായറാഴ്ച വൈകീട്ട്​ മൂന്നോടെ ബൈക്കും കാറും കൂട്ടിയിടിച്ചാണ് അപകടമുണ്ടായത്. ബൈക്ക് യാത്രക്കാരന്‍ ആയിക്കാട് സ്വദേശി അമല്‍ ടോം(21) ഗുരുതര പരിക്കേറ്റ് കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലാണ്. അമല്‍ പാലായില്‍നിന്ന് കിടങ്ങൂരിലേക്ക്​ പോവുകയായിരുന്നു. കിടങ്ങൂര്‍-ഉഴവൂര്‍ റോഡില്‍ മൂന്നുതോടിന് സമീപത്തെ വളവില്‍ രാവിലെ ഏഴോടെയായിരുന്നു രണ്ടാമത്തെ അപകടം. തമിഴ്‌നാട്ടില്‍നിന്ന് കോഴിക്കുഞ്ഞുങ്ങളുമായി എത്തിയ വാന്‍ നിയന്ത്രണം വിട്ട് താഴേക്ക്​ മറിയുകയായിരുന്നു. കോഴിക്കുഞ്ഞുങ്ങള്‍ ചിലത് ചത്തുപോയി.