ചിങ്ങവനം-ഏറ്റുമാനൂർ ഇരട്ടപ്പാത: പിഴവില്ലാതെ പരീക്ഷണം; റിപ്പോർട്ട്​ ഇന്ന്​

കോട്ടയം: ചിങ്ങവനം-ഏറ്റുമാനൂർ ഇരട്ടപ്പാത കമീഷൻ ചെയ്യുന്നതിനു മുന്നോടിയായി സുരക്ഷ പരിശോധന പൂർത്തിയായി. മോട്ടോർ ട്രോളി പരിശോധനയും വേഗ പരിശോധനയുമാണ്​ തിങ്കളാഴ്ച രണ്ടു ഘട്ടത്തിലായി നടത്തിയത്​. ​സതേൺ റെയിൽവേ സേഫ്റ്റി കമീഷണർ (സി.ആർ.എസ്​ ) അഭയകുമാര്‍ റായിയുടെ നേതൃത്വത്തിലായിരുന്നു പരിശോധന. 28 മുതല്‍ പുതിയ പാതയില്‍ ട്രെയിന്‍ ഓടിക്കാൻ കഴിയു​മെന്നാണ്​ പ്രതീക്ഷയെന്ന്​ സി.ആർ.എസ്​ മാധ്യമപ്രവർത്തകരോടു പറഞ്ഞു. പരിശോധന റിപ്പോര്‍ട്ട് ചൊവ്വാഴ്ച റെയില്‍വേയുടെ ചീഫ്​ സേഫ്​റ്റി കമീഷണർക്കു കൈമാറും. രാവി​ലെ പൂജക്കുശേഷം ഒമ്പതോടെ ഏറ്റുമാനൂർ സ്​റ്റേഷനു സമീപം പാറോലിക്കല്‍ ലെവല്‍ ക്രോസിൽനിന്നാണ്​ പരിശോധന ആരംഭിച്ചത്​. കോട്ടയം റെയില്‍വേ സ്‌റ്റേഷന്‍വരെ ഏഴു മോട്ടോര്‍ ട്രോളികളിലായി പാതയുടെ ഫിറ്റ്‌നെസ് പരിശോധിച്ചു. മറ്റൊരു ട്രോളിയിൽ റെയിൽവേ ജീവനക്കാർ അനുഗമിച്ചു. പാലങ്ങൾ, റെയിൽവേ ഗേറ്റുകൾ, സിഗ്​നല്‍ സംവിധാനം, പാളങ്ങളുടെ കൂട്ടിച്ചേര്‍ക്കലുകൾ, ഇലക്​ട്രിക് പോസ്റ്റുകളുടെ പ്രവർത്തനക്ഷമത തുടങ്ങിയവയടക്കമാണ്​ പരിശോധിച്ചത്​. അഞ്ചു വലിയ പാലങ്ങള്‍, 54 ചെറിയ പാലങ്ങള്‍, ഒരു മേൽപാലം എന്നിവയാണ്​ പാതയിലുള്ളത്​. ഇലക്​ട്രിക്കൽ ജോലികളും പാതയിലെ വളവുകളുടെ സ്ഥിതിയും വിലയിരുത്തി. തുടർന്ന്​ മുട്ടമ്പലത്തുനിന്ന്​ ചിങ്ങവനം സ്‌റ്റേഷന്‍വരെ ട്രോളി പരിശോധന നടത്തി. രാവി​ലെ പെയ്ത ശക്തമായ മഴ പരിശോധന അൽപനേരം തടസ്സപ്പെടുത്തി. ട്രോളി പരിശോധനക്കുശേഷം ചിങ്ങവനത്ത് റെയിൽവേ ഉദ്യോഗസ്ഥരുടെയും തോമസ്​ ചാഴികാടൻ എം.പിയുടെയും നേതൃത്വത്തിൽ അവലോകന യോഗം ചേർന്നു. ഉച്ചക്കുശേഷം പാറോലിക്കൽ ലെവൽ ക്രോസിൽനിന്ന്​ പാതയിലൂടെ 110 കിലോമീറ്റർ വേഗത്തിൽ രണ്ടു ബോഗികളുള്ള ട്രാക്ക് റെക്കോഡിങ് കാർ (ഓക്സിലേഷൻ മോണിറ്ററിങ് സിസ്റ്റം) ഉപയോഗിച്ച് വേഗ പരിശോധന നടത്തി. മുട്ടമ്പലം ലെവൽക്രോസ് മുതൽ ചിങ്ങവനം വരെ രണ്ടാമത്തെ വേഗ പരിശോധന നടത്തിയത്​ മൂന്നു ബോഗികളുള്ള ട്രാക്ക് റെക്കോഡിങ് കാർ ഉപയോഗിച്ചാണ്​. വൈകീട്ട്​ ആറോടെ പരിശോധന പൂർത്തിയാക്കി അഭയകുമാര്‍ റായി മടങ്ങി. ഇനി ഏറ്റുമാനൂരിൽനിന്ന്​ പാറോലിക്കൽ ലൈനിലേക്കും കോട്ടയത്തുനിന്ന്​ മുട്ടമ്പലത്തേക്കുമുള്ള ലിങ്ക് കണക്ട് ചെയ്യൽ, സിഗ്​നൽ നവീകരണം, ഇലക്​ട്രിക്​ ലൈറ്റുകൾ പിടിപ്പിക്കൽ എന്നിവ പൂർത്തിയാകാനുണ്ട്​. ഇവ 28നകം പൂർത്തിയാക്കും. റെയില്‍വേ തിരുവനന്തപുരം ഡിവിഷനല്‍ മാനേജര്‍ മുകുന്ദ് രാമസ്വാമി, ദക്ഷിണ റെയില്‍വേ നിർമാണ വിഭാഗം ചീഫ് അഡ്മിനിസ്‌ട്രേറ്റിവ് ഓഫിസര്‍ ആര്‍.പി. ജിങ്കാര്‍, ചീഫ് എന്‍ജിനീയര്‍ വി. രാജഗോപാല്‍, ചീഫ് ബ്രിഡ്​ജ് എന്‍ജിനീയര്‍ സുമിത് സിംഗാള്‍ എന്നിവര്‍ സുരക്ഷാ കമീഷണര്‍ക്കൊപ്പമുണ്ടായിരുന്നു. കമീഷണർക്ക്​​ അതൃപ്തിയില്ല -എം.പി കോട്ടയം: സുരക്ഷ പരിശോധനയുടെ വിവരങ്ങൾ റെയിൽവേ സേഫ്റ്റി കമീഷണർ (സി.ആർ.എസ്​ ) അഭയകുമാര്‍ റായി വെളിപ്പെടുത്തിയിട്ടില്ലെന്ന്​ തോമസ്​ ചാഴികാടൻ എം.പി പറഞ്ഞു. ഇതുസംബന്ധിച്ച റിപ്പോർട്ട്​ ചൊവ്വാഴ്ച നൽകുമെന്നാണ്​ അറിയിച്ചത്​. പ്രവൃത്തികളിൽ അതൃപ്തി അറിയിച്ചിട്ടില്ലാത്തതിനാൽ 28നുതന്നെ പുതിയ പാത കമീഷൻ ചെയ്യാനാകുമെന്നാണ്​ പ്രതീക്ഷയെന്നും ​എം.പി വ്യക്തമാക്കി.